തിരുവനന്തപുരം: സംസ്ഥാനത്ത് തീവ്ര വോട്ടര് പട്ടിക പരിഷ്കാരത്തിന് തുടക്കമായി. രാജ്ഭവനില് സംസ്ഥാന മുഖ്യ തിരഞ്ഞെടുപ്പ് ഓഫീസര് രത്തന് യു ഖേല്ക്കര് ആദ്യ എന്യൂമറേഷന് ഫോം ഗവര്ണര് രേജാന്ദ്ര വിശ്വനാഥ് ആര്ലേക്കര്ക്ക് നല്കിയാണ് എസ്ഐആറിന് തുടക്കം കുറിച്ചത്. സ്വതന്ത്രവും നിഷ്പക്ഷവുമായ തിരഞ്ഞെടുപ്പിന് സമഗ്രവും തെറ്റില്ലാത്തതുമായ വോട്ടര് പട്ടിക അനിവാര്യമാണെന്നും വേഗത്തിലുള്ളതും പിശകുകളില്ലാത്തതുമായ പുനരവലോകനത്തിനായി ജനങ്ങള് സഹകരിക്കണമെന്നും ഗവര്ണര് പറഞ്ഞു. പട്ടികയിൽ നിന്ന് ആരെയും ഒഴിവാക്കിയിട്ടില്ലെന്ന് ഉറപ്പാക്കണമെന്നും ഗവർണർ നിർദേശം നൽകി.
സംസ്ഥാനത്ത് തീവ്രവോട്ടർ പട്ടിക പരിഷ്കരണം നടപ്പാക്കുന്നതില് ഇടതുപക്ഷത്തിന്റേയും കോണ്ഗ്രസിന്റെയും എതിര്പ്പ് വകവെക്കാതെയാണ് കേന്ദ്ര നീക്കം. ഇത് സംബന്ധിച്ച് മുഖ്യതിരഞ്ഞെടുപ്പ് ഓഫീസർ വിളിച്ചുചേർത്ത യോഗത്തിൽ ബിജെപി ഒഴികെ മറ്റെല്ലാ രാഷ്ട്രീയപാർട്ടികളും എതിർപ്പ് അറിയിച്ചിരുന്നു.
എസ്ഐആറിന്റെ ഭാഗമായി വീടുകയറിയുള്ള വിവരശേഖരണം (എന്യൂമറേഷൻ) നവംബർ നാലു മുതൽ ഡിസംബർ നാലു വരെ നടക്കും. പ്രാഥമിക വോട്ടർപ്പട്ടിക ഡിസംബർ ഒമ്പതിനു പ്രസിദ്ധീകരിക്കും. ഇതിന്മേലുള്ള ഹിയറിങ്ങും പരിശോധനയും ഡിസംബർ ഒമ്പതു മുതൽ 2026 ജനുവരി 31 വരെ നടക്കും.
SUMMARY: SIR begins in the state; inaugurated by the Governor
