ആലപ്പുഴ: സ്വന്തം കുഞ്ഞിന്റെ ജീവൻ പണയപ്പെടുത്തി ആനക്കൊമ്പിൽ ഇരുത്തി പാപ്പാന്റെ അപകടകരമായ അഭ്യാസം. ഹരിപ്പാട് സ്കന്ദൻ എന്ന ആനയുടെ പാപ്പാൻ അഭിലാഷാണ് അഞ്ചുമാസം മാത്രം പ്രായമുള്ള കുഞ്ഞുമായി ഇത്തരമൊരു സാഹസത്തിന് മുതിർന്നത്. ആനക്കൊമ്പിൽ ഇരിക്കുന്നതിനിടെ കുഞ്ഞ് കൈയില്‍ നിന്നും വഴുതി താഴേക്ക് വീഴുന്ന ഭയപ്പെടുത്തുന്ന ദൃശ്യങ്ങളും പുറത്തുവന്നു.
കുട്ടി പരുക്കേല്‍ക്കാതെ രക്ഷപ്പെട്ടത് തലനാരിഴയ്ക്കാണ്. കഴിഞ്ഞ ഓഗസ്റ്റില്‍ രണ്ട് പാപ്പാന്മാരെ ആക്രമിച്ച ചരിത്രമുള്ള ആനയാണ് സ്കന്ദൻ. ആ സംഭവത്തില്‍ ഒരു പാപ്പാൻ കൊല്ലപ്പെടുകയും മറ്റൊരാള്‍ക്ക് ഗുരുതരമായി പരുക്കേല്‍ക്കുകയും ചെയ്തിരുന്നു. പരുക്കേറ്റ പാപ്പാൻ ഇപ്പോഴും ചികിത്സയില്‍ തുടരുകയാണ്. ഈ അക്രമാസക്തമായ ചരിത്രമുള്ളതിനാലാണ് മാസങ്ങളായി ആനയെ ഒരിടത്ത് തന്നെ തളച്ചിട്ടിരിക്കുന്നത്.
ഭക്ഷണവും വെള്ളവും ആന തളയ്ക്കപ്പെട്ട സ്ഥലത്ത് എത്തിച്ചു നല്‍കുകയാണ് പതിവ്. ഈ സാഹചര്യങ്ങള്‍ നിലനില്‍ക്കെയാണ് ആനയുടെ സ്വഭാവത്തെ തീർത്തും അവഗണിച്ചുകൊണ്ട് പാപ്പാൻ കുഞ്ഞുമായി ആനയ്ക്ക് മുന്നിലെത്തിയത്.
SUMMARY: The priest’s practice of placing a baby on the trunk of a killer elephant
