ബെംഗളൂരു: രാജ്യത്തെ അതിവേഗം വളരുന്ന നഗരങ്ങളിലൊന്നായ ബെംഗളൂരുവിൽ പൊതുശൗചാലയങ്ങളുടെ ഗുരുതരമായ അപര്യാപ്തതയും നിലവാരക്കുറവും തുറന്നുകാട്ടുന്ന റിപ്പോർട്ട് പുറത്തുവന്നു. ബെംഗളൂരു പൊളിറ്റിക്കൽ ആക്ഷൻ കമ്മിറ്റി (ബി-പാക്)യുടെ വിദ്യാർഥി സന്നദ്ധസംഘമായ ബി-ക്ലിപ്പ് നടത്തിയ പഠനത്തിലാണ് നഗരത്തിൽ ശരാശരി 30,000 പേർക്ക് ഒരു പൊതുശൗചാലയം മാത്രമാണ് ലഭ്യമെന്ന് കണ്ടെത്തിയത്. ഏകദേശം 1.4 കോടി ജനസംഖ്യയുള്ള നഗരത്തിൽ 800 മുതൽ 900 വരെ പൊതുശൗചാലയങ്ങൾ മാത്രമാണുള്ളതെന്നും റിപ്പോർട്ടിൽ പറയുന്നു.
2026 ഏപ്രിൽ, മേയ് മാസങ്ങളിലായി നഗരത്തിലെ 142 പൊതുശൗചാലയങ്ങൾ പരിശോധിച്ചാണ് പഠനം നടത്തിയത്. ഇവയിൽ 37 എണ്ണം (26 ശതമാനം) പൂർണമായും പ്രവർത്തനരഹിതമായിരുന്നു. പ്രവർത്തനക്ഷമമായ ശൗചാലയങ്ങളിൽ പോലും അടിസ്ഥാന സൗകര്യങ്ങളുടെ അഭാവം വ്യാപകമാണെന്ന് റിപ്പോർട്ട് ചൂണ്ടിക്കാട്ടുന്നു. പരിശോധിച്ച ശൗചാലയങ്ങളിൽ വെറും ആറെണ്ണം മാത്രമാണ് മികച്ച ശുചിത്വനിലവാരം പുലർത്തിയത്. 58 ശതമാനം ശൗചാലയങ്ങളിലും ദുർഗന്ധം അനുഭവപ്പെട്ടതായും, 56 ശതമാനത്തിൽ മാത്രമാണ് മതിയായ വെളിച്ചം ഉണ്ടായിരുന്നതായും കണ്ടെത്തി.
പ്രവർത്തനക്ഷമമായ ശൗചാലയങ്ങളിൽ 40 ശതമാനത്തിൽ മാത്രമാണ് ആവശ്യത്തിന് വെള്ളം ലഭ്യമായിരുന്നത്. ഒരു ശൗചാലയത്തിലും സോപ്പ് വിതരണം ചെയ്യാനുള്ള സംവിധാനമോ മാലിന്യക്കൂടുകളോ ഉണ്ടായിരുന്നില്ല. സ്ത്രീകളുടെയും കുട്ടികളുടെയും സുരക്ഷയും ശുചിത്വവും ഉറപ്പാക്കാൻ ആവശ്യമായ സൗകര്യങ്ങൾ പല കേന്ദ്രങ്ങളിലും ഇല്ലായിരുന്നു. കൂടാതെ ഒൻപത് ശൗചാലയങ്ങളിൽ മാത്രമാണ് റാംപ് ഉണ്ടായിരുന്നത്. ഇതോടെ 94 ശതമാനം പൊതുശൗചാലയങ്ങളും ഭിന്നശേഷിക്കാർക്ക് ഉപയോഗിക്കാൻ അനുയോജ്യമല്ലാത്ത അവസ്ഥയിലാണെന്ന് റിപ്പോർട്ട് വ്യക്തമാക്കുന്നു.
ജനത്തിരക്കേറിയ ബസ് സ്റ്റാൻഡുകൾ, മെട്രോ സ്റ്റേഷനുകൾ, വിപണികൾ, പാർക്കുകൾ, വിനോദസഞ്ചാര കേന്ദ്രങ്ങൾ എന്നിവിടങ്ങളിൽ ആവശ്യത്തിന് പൊതുശൗചാലയങ്ങൾ ഇല്ലാത്തത് പൊതുജനങ്ങൾക്ക് വലിയ ബുദ്ധിമുട്ടുണ്ടാക്കുന്നുവെന്ന് പഠനം വിലയിരുത്തുന്നു. ഇതിന്റെ ഭാഗമായി പ്രവർത്തനരഹിതമായ ശൗചാലയങ്ങൾ 30 ദിവസത്തിനകം പ്രവർത്തനക്ഷമമാക്കുക, നഗരത്തിൽ 1,000-ത്തിലധികം പുതിയ പൊതുശൗചാലയങ്ങൾ സ്ഥാപിക്കുക, എല്ലാ ശൗചാലയങ്ങളിലും വെള്ളം, വൈദ്യുതി, സോപ്പ്, മാലിന്യ നിർമാർജന സംവിധാനം, ഭിന്നശേഷി സൗഹൃദ സൗകര്യങ്ങൾ എന്നിവ നിർബന്ധമായും ഒരുക്കുക തുടങ്ങിയ ശുപാർശകളും റിപ്പോർട്ട് മുന്നോട്ടുവയ്ക്കുന്നു.
ബെംഗളൂരു പോലുള്ള വൻനഗരത്തിൽ പൊതുശുചിത്വ സംവിധാനങ്ങൾ കൂടുതൽ ശക്തിപ്പെടുത്താതെ നഗരത്തിന്റെ ആരോഗ്യസുരക്ഷയും ജീവിതനിലവാരവും മെച്ചപ്പെടുത്താനാകില്ലെന്ന് റിപ്പോർട്ട് മുന്നറിയിപ്പ് നൽകുന്നു.
SUMMARY: There is only one public toilet for 30,000 people; Report says toilet facilities in Bengaluru are in crisis
