ബാങ്കോക്ക്: തായ്ലൻഡില് ഓടിക്കൊണ്ടിരിക്കുന്ന ട്രെയിനിന് മുകളിലേക്ക് ക്രെയിൻ വീണുണ്ടായ അപകടത്തില് 22 പേർക്ക് ദാരുണാന്ത്യം. അപകടത്തില് 30 ഓളം പേർക്ക് പരുക്കേറ്റു. ബാങ്കോക്കിന് 230 കിലോമീറ്റർ വടക്കുകിഴക്കായി നഖോണ് റാച്ചസിമ പ്രവിശ്യയിലെ സിഖിയോ ജില്ലയിലാണ് അപകടമുണ്ടായത്.
ബാങ്കോക്കില് നിന്ന് ഉബോണ് റാച്ചതാനി പ്രവിശ്യയിലേക്ക് പോകുകയായിരുന്ന ട്രെയിനാണ് അപകടത്തില്പ്പെട്ടത്. അതിവേഗ റെയില് പാളം നിർമ്മാണത്തിന് അടിയിലൂടെ പോകവേയാണ് നിർമാണത്തിലിരുന്ന മേല്പ്പാലത്തില് നിന്നും ക്രെയിൻ ട്രെയിനിന്റെ മുകളിലേക്ക് വീണത്. ഹൈസ്പീഡ് റെയില്വേ പദ്ധതിയുടെ ഭാഗമായി നിർമ്മാണ പ്രവർത്തനങ്ങളില് ഏർപ്പെട്ടിരുന്ന ക്രെയിനാണ് ട്രെയിനിന് മുകളിലേക്ക് പതിച്ചത്.
അപകടത്തില് ഒരു ബോഗി പൂർണ്ണമായും തകരുകയും ട്രെയിൻ പാളം തെറ്റുകയും ചെയ്തു. ട്രെയിനിന് തീപിടിച്ചെങ്കിലും ഉടനെ തന്നെ അണയ്ക്കാനായത് വൻ ദുരന്തം ഒഴിവാക്കിയതായി വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്യുന്നു. ട്രെയിൻ കമ്പാർട്ടുമെന്റുകളില് നിരവധി പേർ കുടുങ്ങിക്കിടക്കുന്നതായും ആശങ്കയുണ്ട്. ട്രെയിനിനുള്ളില് 200-ഓളം യാത്രക്കാരാണ് ഉണ്ടായിരുന്നതെന്നാണ് വിവരം.
SUMMARY: Train derailment in Thailand; 22 dead, 30 injured
