വാഷിങ്ടൺ: ഇറാനുമായുള്ള സൈനിക സംഘർഷം ഉടൻ അവസാനിച്ചേക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. മാസങ്ങൾ നീണ്ട പോരാട്ടത്തിന് ശേഷം ചില തരം ആയുധങ്ങളുടെയും വെടിമരുന്നുകളുടെയും ലഭ്യതയിൽ യുഎസ് സൈന്യം കുറവ് നേരിടുന്നുണ്ടെന്ന് സമ്മതിച്ച അദ്ദേഹം, എങ്കിലും യുദ്ധം കൂടുതൽ കാലം നീണ്ടുനിൽക്കില്ലെന്നും ട്രംപ് വൈറ്റ് ഹൗസിൽ മാധ്യമങ്ങളോട് പറഞ്ഞു.
അഞ്ച് മാസമായി തുടരുന്ന ഇറാൻ യുദ്ധത്തിനിടെ അമേരിക്ക ദീർഘദൂര മിസൈലുകളുടെ ആഗോള ശേഖരത്തിന്റെ വലിയൊരു ഭാഗം ഉപയോഗിച്ചുവെന്ന റിപ്പോർട്ടുകൾ പുറത്തുവന്നതിന് പിന്നാലെയാണ് ട്രംപിന്റെ പ്രതികരണം. ആയുധ ശേഖരത്തെക്കുറിച്ചുള്ള ചോദ്യങ്ങൾക്ക് മറുപടിയായി യുഎസ് സൈന്യത്തിന് ശക്തമായ ആയുധങ്ങളുടെ വലിയ ശേഖരമുണ്ടെന്നും എന്നാൽ ചില നിർണായക വിഭാഗങ്ങളിൽ വിതരണം കുറവാണെന്നും അദ്ദേഹം പറഞ്ഞു. പേട്രിയറ്റ്, ടോമഹാക്ക് മിസൈലുകൾ എന്നിവയുടെ ഉൽപ്പാദനം വർദ്ധിപ്പിക്കുന്നതിനായി യുഎസ് പ്രതിരോധ നിർമ്മാതാക്കൾ പുതിയ ഉൽപ്പാദന കേന്ദ്രങ്ങൾ സ്ഥാപിച്ചുവരികയാണെന്നും അദ്ദേഹം കൂട്ടിച്ചേർത്തു.
അതേസമയം ഹോർമുസ് കടലിടുക്ക് വീണ്ടും തുറക്കുന്നതിനായി അമേരിക്ക, ഇറാൻ, ഒമാൻ എന്നീ രാജ്യങ്ങൾക്കിടയിൽ താൽക്കാലിക ധാരണയ്ക്ക് വഴിയൊരുങ്ങുന്നതായാണ് റിപ്പോർട്ടുണ്ട്. ആഗോള എണ്ണക്കയറ്റുമതിക്ക് നിർണായകമായ ഹോർമുസ് കടലിടുക്കിലൂടെയുള്ള കപ്പൽഗതാഗതം പുനഃസ്ഥാപിക്കാനുള്ള ചർച്ചകൾ അന്തിമഘട്ടത്തിലാണെന്നാണ് വിവരം.
SUMMARY: Trump says war with Iran could end soon; tentative agreement to open Hormuz
