ബെംഗളൂരു: കാർ ട്രക്കുമായി കൂട്ടിയിടിച്ച് രണ്ട് വിദ്യാർഥികൾ മരിച്ചു. ബെംഗളൂരു – മൈസൂരു എക്സ്പ്രസ് വേയിൽ ശനിയാഴ്ചയാണ് അപകടം. ബെംഗളൂരുവിലെ ബൊമ്മസാന്ദ്ര സ്വദേശികളായ വിശ്വ (22), സൂര്യ (18) എന്നിവരാണ് മരിച്ചത്. വിദ്യാർഥികൾ സഞ്ചരിച്ച എസ്‌യുവി കാർ നിയന്ത്രണം വിട്ട് ട്രക്കിലേക്ക് ഇടിക്കുകയായിരുന്നു.
വിശ്വ രണ്ടാം വർഷ ഡിപ്ലോമ വിദ്യാർഥിയാണ്. സൂര്യ രണ്ടാം വർഷ പ്രീ-യൂണിവേഴ്‌സിറ്റി വിദ്യാർഥിയാണ്. സുഹാസ് എന്നയാളാണ് കാർ ഓടിച്ചിരുന്നത്. ഇവർ മൈസൂരുവിൽ നിന്ന് ബെംഗളൂരുവിലേക്ക് മടങ്ങുകയായിരുന്നു.
രാമനഗരയിലെ കെമ്പൈനദൊഡി ഗ്രാമത്തിന് സമീപം ബെംഗളൂരു-മൈസൂർ എക്സ്പ്രസ് വേയിൽ വെച്ചായിരുന്നു അപകടം. ഉടൻ തന്നെ സൂര്യയെയും വിശ്വയെയും അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഗുരുതരമായി പരുക്കേറ്റ കാർ ഡ്രൈവർ സുഹാസ് അപകടനില തരണം ചെയ്തതായി ട്രാഫിക് പോലീസ് അറിയിച്ചു. സംഭവത്തിൽ രാമനഗര പോലീസ് കേസെടുത്തു.
TAGS: BENGALURU UPDATES| ACCIDENT
SUMMARY: Two students lost life after car crashes into truck
