ചെന്നൈ: തൃഷ കൃഷ്ണനും സൂര്യയും പ്രധാന വേഷത്തില് എത്തുന്ന ചിത്രമായ കറുപ്പിന് തമിഴ്നാട്ടില് പ്രത്യേക ഷോ നടത്താന് അനുമതി. രാവിലെ ഒമ്പത് മണിക്കുള്ള പ്രദര്ശനത്തിനാണ് വിജയ് സര്ക്കാര് അനുമതി നല്കിയത്. സിനിമയുടെ അണിയറ പ്രവര്ത്തകര് മുഖ്യമന്ത്രി സി ജോസഫ് വിജയ്ക്ക് നന്ദി അറിയിച്ചു. മെയ് 14നാണ് കറുപ്പ് റിലീസ്.
വിജയുടെ ചിത്രം പങ്കുവച്ചാണ് സിനിമയുടെ അണിയറ പ്രവര്ത്തകര് നന്ദി അറിയിച്ചത്. മുഖ്യമന്ത്രിയുടെ ഓഫീസില് വിജയ് ഇരിക്കുന്ന ചിത്രമാണ് അവര് എക്സില് പോസ്റ്റ് ചെയ്തിരിക്കുന്നത്. മുഖ്യമന്ത്രി വിജയ്ക്ക് പ്രത്യേക നന്ദി. മെയ് 14ന് രാവിലെ ഒമ്പത് മണിക്ക് ഷോയുണ്ടാകുമെന്നും നിര്മാണ കമ്പനി അറിയിച്ചു. കറുപ്പ് സിനിമയുടെ ട്രെയിലര് കഴിഞ്ഞ ദിവസം പുറത്തുവന്നിരുന്നു. ചിത്രത്തിന്റെ സ്വഭാവം വ്യക്തമാക്കുന്നതായിരുന്നു ട്രെയിലര്.
ആക്ഷനും കോടതി രംഗങ്ങളുമെല്ലാം ഉള്പ്പെടുന്ന സിനിമ സൂര്യയുടെ മറ്റൊരു ഹിറ്റാകുമെന്നാണ് കരുതുന്നത്. ഒരു വൃദ്ധനും കൊച്ചുമകളും വിവാദത്തില്പ്പെടുന്നതും നീതിക്ക് വേണ്ടി പോരാടുന്നതുമാണ് സിനിമയുടെ തുടക്കം. തൃഷയാണ് ഇവരുടെ അഭിഭാഷകയായി എത്തുന്നത്. ആര്ജെ ബാലാജി വില്ലന് വേഷത്തിലാണുള്ളത്. നിയമ നടപടികള് നീളുന്ന ഘട്ടത്തിലാണ് സൂര്യയുടെ കഥാപാത്രത്തിന്റെ വരവ്. കോടതിക്ക് അകത്തും പുറത്തും നടക്കുന്ന പോരാട്ടങ്ങളും കിടലന് സംഭാഷണങ്ങളും നിറയുന്നതാണ് സിനിമ.
ആര്ജെ ബാലാജിയാണ് കഥയും സംവിധാനവും. സൂര്യ, തൃഷ കൃഷ്ണന് എന്നിവര്ക്ക് പുറമെ, ഇന്ദ്രന്സ്, സ്വാസിക, ശിവദ, അനഘ മായ രവി, സുപ്രീത് റെഡ്ഡി തുടങ്ങിയവരെല്ലാം പ്രധാന വേഷങ്ങളില് സിനിമയിലുണ്ട്. സായ് അഭ്യങ്കര് ആണ് സംഗീതം. തൃഷയും സൂര്യയും ഏറെ കാലത്തിന് ശേഷം ഒന്നിക്കുന്ന ചിത്രം കൂടിയാണ് കറുപ്പ്.
SUMMARY: Vijay gives special permission to Trisha’s film Karup
