ബെംഗളൂരു: പഹൽഗാം ഭീകരാക്രമണത്തെത്തുടർന്ന് ഇന്ത്യൻ സായുധ സേന നടത്തിയ പ്രതികാര നടപടിയായ ഓപ്പറേഷൻ സിന്ദൂരിന് പിന്തുണ പ്രഖ്യാപിച്ച് ബിബിഎംപി. ബെംഗളൂരുവിൽ നാളെ തിരംഗ യാത്ര (ഫ്ലാഗ് മാർച്ച്) സംഘടിപ്പിക്കുമെന്ന് ബിബിഎംപി അറിയിച്ചു. മാർച്ച് കെആർ സർക്കിളിൽ നിന്ന് ആരംഭിച്ച് ചിന്നസ്വാമി ക്രിക്കറ്റ് സ്റ്റേഡിയത്തിലേക്ക് എത്തും. മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും പരിപാടിയിൽ പങ്കെടുക്കും.
ബിബിഎംപിയുടെ സ്പെഷ്യൽ കമ്മീഷണർ (അഡ്മിനിസ്ട്രേഷൻ) എല്ലാ ജീവനക്കാരോടും ഉദ്യോഗസ്ഥരോടും രാവിലെ 9 മണിക്ക് മുമ്പ് കെആർ സർക്കിളിൽ ഒത്തുകൂടാൻ നിർദ്ദേശിച്ചിട്ടുണ്ട്. പരിപാടിയുടെ സുഗമമായ നടത്തിപ്പ് ഉറപ്പാക്കാൻ ഉദ്യോഗസ്ഥർക്ക് പ്രത്യേക ഉത്തരവാദിത്തങ്ങൾ നൽകിയിട്ടുമുണ്ട്. മാർച്ചിനിടെ ഗതാഗതം സുഗമമാക്കാൻ പോലീസ് വകുപ്പുമായി ഏകോപിപ്പിക്കുന്നതിന് ഈസ്റ്റ്‌ സോണൽ കമ്മീഷണറെ ചുമതലപ്പെടുത്തി. ജീവനക്കാരുടെ ഹാജർനില നിരീക്ഷിക്കാൻ ജോയിന്റ് കമ്മീഷണർമാരോട് ബിബിഎംപി ആവശ്യപ്പെട്ടിട്ടുണ്ട്. തിരക്ക് നിയന്ത്രിക്കാൻ മാർഷലുകളെ വിന്യസിക്കും. കൂടാതെ ആംബുലൻസുകൾ ഉൾപ്പെടെയുള്ള വൈദ്യസഹായം നൽകാൻ ബിബിഎംപി ആരോഗ്യ വിഭാഗത്തോട് ആവശ്യപ്പെട്ടിട്ടുണ്ട്.
TAGS: BENGALURU | BBMP
SUMMARY: BBMP to organise flag march to support Operation Sindoor
