ബെംഗളൂരു: നഗരത്തിലെ അടച്ചിട്ട മഴവെള്ള ഓടകൾ വൃത്തിയാക്കുന്നതിനായി റോബോട്ടിക് യന്ത്രം പരീക്ഷിച്ച് ഗ്രേറ്റർ ബെംഗളൂരു അതോറിറ്റി എച്ച്.എസ്.ആർ. ലേഔട്ടിലെ ഏഴാം സെക്ടറിലെ 17-ാം ക്രോസിലാണ് പരീക്ഷണാടിസ്ഥാനത്തിൽ പുതിയ സംവിധാനം ഉപയോഗിച്ചത്.
മനുഷ്യർക്ക് നേരിട്ട് പ്രവേശിക്കാൻ പ്രയാസമുള്ള അടച്ചിട്ട ഓടകളിൽ അടിഞ്ഞുകൂടുന്ന ചെളിയും മാലിന്യങ്ങളും നീക്കം ചെയ്യുന്നതിനാണ് റിമോട്ട് നിയന്ത്രണത്തിലുള്ള റോബോട്ടിക് യന്ത്രം ഉപയോഗിക്കുന്നത്. ഏകദേശം ആറടി വീതിയും 30 അടി നീളവുമുള്ള ഓടയിലാണ് പരീക്ഷണം നടത്തിയത്.
ആറുമണിക്കൂർ നീണ്ട പ്രവർത്തനത്തിലൂടെ ഓടയിൽ അടിഞ്ഞുകൂടിയ രണ്ടടിയിലധികം ആഴത്തിലുള്ള ചെളി നീക്കം ചെയ്യാൻ കഴിഞ്ഞതായി അധികൃതർ അറിയിച്ചു. റിമോട്ട് കൺട്രോൾ സംവിധാനം ഉപയോഗിച്ച് പ്രവർത്തിപ്പിക്കുന്ന യന്ത്രത്തിന് അടച്ചിട്ട ഓടയ്ക്കുള്ളിൽ ഏകദേശം 30 മീറ്റർ വരെ സഞ്ചരിച്ച് ശുചീകരണം നടത്താൻ കഴിയും.
എച്ച്.എസ്.ആർ. ലേഔട്ടിലെ പരീക്ഷണം വിജയകരമായാൽ നഗരത്തിലെ മറ്റ് പ്രദേശങ്ങളിലും റോബോട്ടിക് ശുചീകരണ സംവിധാനം വ്യാപിപ്പിക്കാനാണ് ജി.ബി.എ.യുടെ ആലോചന. തൊഴിലാളികൾക്ക് അപകടസാധ്യതയുള്ളതും നേരിട്ട് പ്രവേശിക്കാൻ ബുദ്ധിമുട്ടുള്ളതുമായ ഓടകളുടെ ശുചീകരണം കൂടുതൽ സുരക്ഷിതമാക്കാൻ പുതിയ സാങ്കേതികവിദ്യ സഹായിക്കുമെന്നാണ് പ്രതീക്ഷ.
അതേസമയം, സിൽക്ക് ബോർഡ്–എച്ച്.എസ്.ആർ. ലേഔട്ട് പാതയിലെ വെള്ളക്കെട്ട് പ്രശ്നം പരിഹരിക്കുന്നതിനായി മൂന്ന് മീറ്റർ വ്യാസമുള്ള വലിയ പൈപ്പ് ഡ്രെയിനേജ് സംവിധാനവും പരിഗണനയിലുണ്ട്.
നഗരത്തിലെ മഴക്കാല വെള്ളക്കെട്ട് കുറയ്ക്കുന്നതിനും മഴവെള്ളം സുഗമമായി ഒഴുകിപ്പോകുന്നതിനും ഓടകളുടെ കൃത്യമായ പരിപാലനം അനിവാര്യമാണ്. പുതിയ റോബോട്ടിക് സംവിധാനം വ്യാപകമായി നടപ്പാക്കിയാൽ നഗരത്തിലെ ഡ്രെയിനേജ് ശുചീകരണ പ്രവർത്തനങ്ങളിൽ മാറ്റമുണ്ടാകും എന്നാണ് പ്രതീക്ഷ.
SUMMARY: Robotic machine being tested to clean drains in HSR Layout
