ചെന്നൈ: തമിഴ് സിനിമയുടെ ‘മക്കള്‍ സെല്‍വൻ’ വിജയ് സേതുപതി തന്റെ സിനിമാ ജീവിതത്തിലെ മറ്റൊരു വലിയ ചരിത്ര നാഴികക്കല്ലിന് ഒരുങ്ങുകയാണ്. 54-ാമത് അന്താരാഷ്ട്ര എമ്മി അവാർഡ് വേദിയില്‍ അവാർഡ് സമ്മാനിക്കുന്ന പ്രമുഖരില്‍ ഒരാളായി താരം പങ്കെടുക്കും. ഈ അഭിമാനകരമായ ആഗോള ചടങ്ങില്‍ അവാർഡ് പ്രസന്ററാകുന്ന ആദ്യ ഇന്ത്യൻ നടൻ എന്ന അപൂർവ്വ നേട്ടവും ഇതോടെ വിജയ് സേതുപതി സ്വന്തമാക്കുകയാണ്. ന്യൂയോർക്കില്‍ വെച്ചാണ് ഈ പ്രശസ്തമായ പുരസ്കാര നിശ അരങ്ങേറുന്നത്.
വർഷങ്ങള്‍ക്ക് മുമ്പ് സിനിമയിലെ ആള്‍ക്കൂട്ടത്തില്‍ ഒരാളായി, ജൂനിയർ ആർട്ടിസ്റ്റായി വളരെ ചെറിയ വേഷങ്ങളില്‍ മുഖം കാണിച്ചു തുടങ്ങിയ വിജയ് സേതുപതി, സ്വന്തം കഠിനാധ്വാനവും അഭിനയ മികവും കൊണ്ട് മാത്രമാണ് മുന്നണിയിലേക്ക് ഉയർന്നുവന്നത്. അന്ന് ക്യാമറയ്ക്ക് മുന്നില്‍ ഒരു അവസരത്തിനായി കാത്തുനിന്ന ആ ചെറുപ്പക്കാരൻ ഇന്ന് ലോക സിനിമയ്ക്ക് മുന്നില്‍ ഇന്ത്യയുടെ അഭിമാന മുഖമായി മാറുന്ന കാഴ്ച സിനിമാ പ്രേമികള്‍ക്ക് വലിയ പ്രചോദനമാണ്.
ഇതിനുമുമ്പ് 2016-ല്‍ പ്രൈംടൈം എമ്മി അവാർഡ് വേദിയില്‍ പ്രിയങ്ക ചോപ്ര അവാർഡ് സമ്മാനിച്ചിട്ടുണ്ടെങ്കിലും അന്താരാഷ്ട്ര എമ്മിയില്‍ ആദ്യമായാണ് ഒരു ഇന്ത്യൻ നടന് ഈ അവസരം ലഭിക്കുന്നത്. ഇന്റർനാഷണല്‍ അക്കാദമി ഓഫ് ടെലിവിഷൻ ആർട്സ് ആൻഡ് സയൻസസ് ബോർഡ് അംഗവും നിർമ്മാതാവുമായ കവിത ഗുപ്തയാണ് വിജയ് സേതുപതി ഉള്‍പ്പെടെയുള്ള ഇന്ത്യൻ പ്രതിഭകളെ എമ്മി വേദിയിലേക്ക് എത്തിക്കുന്നതില്‍ നിർണായക പങ്കുവഹിച്ചത്.
മദ്രാസിന്റെ പശ്ചാത്തലത്തില്‍ ഒരുങ്ങിയ ‘ബത്ത’ എന്ന ചിത്രത്തിലെ ഭയപ്പെടുത്തുന്ന ഗ്യാങ്സ്റ്റർ വേഷവും ‘ജയിലർ 2’വിലെ കാമിയോ റോളുമാണ് താരത്തിന്റേതായി ഒടുവില്‍ പുറത്തിറങ്ങിയത്. മണിരത്നത്തിന്റെ സംവിധാനത്തില്‍ സായ് പല്ലവിക്കൊപ്പം അഭിനയിക്കുന്ന ‘ഇഞ്ചി വെള്ളം’ ആണ് വിജയ് സേതുപതിയുടേതായി അണിയറയില്‍ ഒരുങ്ങുന്ന അടുത്ത വൻകിട പ്രൊജക്റ്റ്. കൂടാതെ, ചൈന ഉള്‍പ്പെടെയുള്ള വിദേശ രാജ്യങ്ങളില്‍ വൻ വിജയം നേടിയ അദ്ദേഹത്തിന്റെ 2024-ലെ സൂപ്പർഹിറ്റ് ത്രില്ലർ ചിത്രം ‘മഹാരാജ’ ഹോളിവുഡിലേക്ക് റീമേക്ക് ചെയ്യാനുള്ള ചർച്ചകളും അന്തിമ ഘട്ടത്തിലാണ്.
SUMMARY: Vijay Sethupathi to host at the International Emmys; becomes the first Indian to achieve this feat
