ബെംഗളൂരു: രാജാജിനഗറിലെ വീട്ടിൽ ഭാര്യയെയും ഭാര്യയുടെ കുടുംബത്തിലെ ആറുപേരെയും കൊലപ്പെടുത്തിയെന്ന കേസിൽ 13 വയസ്സുകാരന്റെ മൊഴി അന്വേഷണത്തിൽ നിർണായകമായി. കേസിലെ പ്രതിയായ ടാക്സി ഡ്രൈവർ ഇന്ദുശേഖർ എന്ന ശേഖർ മൃതദേഹങ്ങൾ ചാക്കുകളിലാക്കി കാറിൽ കൊണ്ടുപോകുന്നത് കണ്ടതായി കുട്ടി പോലീസിനോട് മൊഴിയാണ് വഴിത്തിരിവായത്. കൊല്ലപ്പെട്ടവരിൽ രണ്ടുപേരിൽ ഒരാളുടെ മകനാണ് 13 വയസ്സുകാരൻ. പ്രതി നാല് ചാക്കുകളിലായി മൃതദേഹങ്ങൾ കൊണ്ടുപോയി വിവിധ ഒറ്റപ്പെട്ട സ്ഥലങ്ങളിൽ ഉപേക്ഷിക്കുന്നത് കണ്ടതായാണ് കുട്ടിയുടെ മൊഴി. ഈ വിവരങ്ങളുടെ അടിസ്ഥാനത്തിൽ പോലീസ് കൂടുതൽ പരിശോധനകളും തിരച്ചിലും നടത്തി വരികയാണ്.
പ്രതിയുടെ ഭാര്യ സുനിത, ഭാര്യയുടെ മാതാവ് രൂപാവതി, ഭാര്യയുടെ സഹോദരന്മാരായ ശിവകുമാർ, ശങ്കർ, ഇവരുടെ ഭാര്യമാരായ ദിവ്യ, നളിനി, ശിവകുമാറിന്റെ ഏഴുവയസ്സുകാരനായ മകൻ പുനീത് എന്നിവരാണ് കൊല്ലപ്പെട്ടത്. കുടുംബവഴക്കുകളും ഭാര്യ സ്വന്തം വീട്ടുകാരുമായി പുലർത്തിയിരുന്ന ബന്ധത്തെച്ചൊല്ലിയുള്ള തർക്കങ്ങളുമാണ് കൊലപാതകങ്ങൾക്ക് പിന്നിലെന്നാണ് അന്വേഷണത്തിലെ പ്രാഥമിക നിഗമനം.
ഏഴുവയസ്സുകാരനായ പുനീതിന്റെ മൃതദേഹം നന്ദി ഹിൽസിന്റെ താഴ്‌വരയിൽനിന്ന് പോലീസ് കണ്ടെത്തിയിരുന്നു. ശേഷിക്കുന്ന ആറുപേരുടെ മൃതദേഹങ്ങൾ കണ്ടെത്താനുള്ള തിരച്ചിൽ തുടരുകയാണ്. മൃതദേഹങ്ങൾ കൊണ്ടുപോകാൻ ഉപയോഗിച്ചതായി സംശയിക്കുന്ന കാറും കൊലപാതകത്തിന് ഉപയോഗിച്ചതായി കരുതുന്ന ഗ്രൈൻഡിങ് സ്റ്റോണും പോലീസ് കസ്റ്റഡിയിലെടുത്തിട്ടുണ്ട്.
നളിനിയെ കാണാതായതിനെ തുടർന്ന് ബന്ധുക്കൾ ശ്രീരാംപുര പോലീസ് സ്റ്റേഷനിൽ പരാതി നൽകിയതോടെയാണ് സംഭവം പുറത്തറിയുന്നത്. തുടർന്ന് നടത്തിയ അന്വേഷണത്തിലാണ് ശേഖറിനെ ചോദ്യം ചെയ്യുകയും കൂട്ടക്കൊല സംബന്ധിച്ച വിവരങ്ങൾ പുറത്തുവരികയും ചെയ്തത്. കേസിൽ പ്രതിയുടെ പങ്ക്, മൃതദേഹങ്ങൾ ഉപേക്ഷിച്ച സ്ഥലങ്ങൾ, മറ്റാർക്കെങ്കിലും പങ്കുണ്ടോ തുടങ്ങിയ കാര്യങ്ങളിൽ പോലീസ് അന്വേഷണം തുടരുകയാണ്.
SUMMARY: Bengaluru mass murder; 13-year-old’s testimony proves crucial
