ബെംഗളൂരു: പരീക്ഷ പേപ്പർ മൂല്യനിർണയം നടത്തുന്നതിനിടെ മൊബൈൽ ഫോണുകൾ ഉപയോഗിച്ച അധ്യാപകരിൽ നിന്നും വിശദീകരണം തേടി ഉന്നത വിദ്യാഭ്യാസ മന്ത്രി ഡോ. എം. സി. സുധാകർ. ബെംഗളൂരു സിറ്റി യൂണിവേഴ്‌സിറ്റിയിലെ (ബിസിയു) ബിരുദ പ്രോഗ്രാമുകളുടെ ഉത്തരക്കടലാസ് മൂല്യനിർണയത്തിനിടെയായിരുന്നു സംഭവം.
ഇതിന്റെ വീഡിയോ ദൃശ്യങ്ങൾ കോളേജ് വാട്സ്ആപ്പ് ഗ്രൂപ്പുകളിൽ പ്രചരിച്ചിരുന്നു. അധ്യാപകർ ഒരു വശത്ത് മൊബൈൽ ഫോണുകൾ ഉപയോഗിക്കുന്നതും മറുവശത്ത് ഉത്തര സ്ക്രിപ്റ്റുകൾ വിലയിരുത്തുന്നതുമായിരുന്നു ദൃശ്യങ്ങളിലുണ്ടായിരുന്നത്. ഉത്തര സ്ക്രിപ്റ്റുകൾ വിലയിരുത്തുന്നതിനിടെ ചില അധ്യാപകർ ഫോണിൽ ക്രിക്കറ്റ്‌ മാച്ച് കാണുകയായിരുന്നു. വിദ്യാർഥികളിൽ നിന്നും പരാതി ലഭിച്ചതോടെയാണ് ഉന്നത വിദ്യാഭ്യാസ മന്ത്രി അധ്യാപകരോട് റിപ്പോർട്ട് തേടിയിരിക്കുന്നത്.
നിരവധി പരാതികൾ സർവകലാശാല അധികൃതർക്ക് നൽകിയെങ്കിലും ബന്ധപ്പെട്ട അധ്യാപകർക്കെതിരെ നടപടിയൊന്നും ഉണ്ടായിട്ടില്ലെന്ന് വിദ്യാർഥികൾ മന്ത്രിക്ക് നൽകിയ പരാതിയിൽ ആരോപിച്ചു. സംഭവത്തിൽ അധ്യാപകർക്കെതിരെ കർശന നടപടി സ്വീകരിക്കുമെന്ന് മന്ത്രി വ്യക്തമാക്കി.
TAGS: BENGALURU | TEACHERS
SUMMARY: University teachers found using phones during evaluation in Bengaluru, action sought
