ബെംഗളൂരു: ബെംഗളൂരുവിൽ യുവതിയുടെ മൃതദേഹം കഷണങ്ങളാക്കിയ നിലയിൽ ഫ്രിഡ്ജിനുള്ളിൽ കണ്ടെത്തിയ സംഭവത്തിൽ പോലീസിൽ നിന്ന് അന്വേഷണ റിപ്പോർട്ട് ആവശ്യപ്പെട്ട് ദേശീയ വനിതാ കമ്മീഷൻ. മൂന്ന് ദിവസത്തിനകം വിശദമായ റിപ്പോർട്ട് സമർപ്പിക്കാനും കേസിൽ സമഗ്രവും സമയബന്ധിതവുമായ അന്വേഷണം ഉറപ്പാക്കാനും കമ്മീഷൻ ബെംഗളൂരു പോലീസിനോട് ആവശ്യപ്പെട്ടിട്ടുണ്ട്.
മാധ്യമ വാർത്തകളിലൂടെയാണ് സംഭവത്തെക്കുറിച്ച് അറിഞ്ഞതെന്ന് കമ്മീഷൻ പറഞ്ഞു. സംഭവത്തിൽ ഉൾപ്പെട്ട എല്ലാവരുടെയും അറസ്റ്റ് വേഗത്തിലാക്കാനും വ്യക്തമായ അന്വേഷണം ഉറപ്പാക്കാനും കമ്മീഷൻ സംസ്ഥാന പോലീസിന് നിർദേശം നൽകി. വയാലികാവലിലെ അപ്പാർട്ട്മെന്റിലാണ് കഴിഞ്ഞദിവസം യുവതിയെ കൊല്ലപ്പെട്ടനിലയിൽ കണ്ടെത്തിയത്. ബിഹാർ സ്വദേശിയായ മഹാലക്ഷ്മി (29)യാണ് അതിദാരുണമായി കൊല്ലപ്പെട്ടത്. യുവതിയെ കൊലപ്പെടുത്തിയശേഷം മൃതദേഹം മുപ്പതിലേറെ കഷണങ്ങളാക്കി ഫ്രിഡ്ജിൽ സൂക്ഷിച്ചനിലയിലായിരുന്നു.
അപ്പാർട്ട്മെന്റിൽനിന്ന് കനത്ത ദുർഗന്ധം വമിച്ചതോടെയാണ് അരുംകൊല പുറംലോകമറിയുന്നത്. ദുർഗന്ധം വമിക്കുന്നത് കഴിഞ്ഞദിവസങ്ങളിൽ തന്നെ അയൽക്കാരുടെ ശ്രദ്ധയിൽപ്പെട്ടിരുന്നു. തുടർന്ന് കെട്ടിട ഉടമ, സമീപത്ത് താമസിക്കുന്ന മഹാലക്ഷ്മിയുടെ അമ്മയെയും സഹോദരിയെയും വിവരമറിയിക്കുകയായിരുന്നു. ഇവരുടെ സാന്നിധ്യത്തിൽ അപ്പാർട്ട്മെന്റിൽ പരിശോധന നടത്തിയതോടെയാണ് ഫ്രിഡ്ജിനുള്ളിൽ മൃതദേഹാവശിഷ്ടങ്ങൾ കണ്ടെത്തിയത്. കൊലപാതകത്തിന് ഉത്തരവാദികളായവരെ എത്രയും വേഗം പിടികൂടുമെന്ന് ആഭ്യന്തര മന്ത്രി ജി. പരമേശ്വര പറഞ്ഞു.
TAGS: BENGALURU | CRIME
SUMMARY: Women’s commision seeks report on womens murder in Bangalore
