ബെംഗളൂരു: സംസ്ഥാനത്ത് ബെംഗളൂരു ഉൾപ്പെടെയുള്ള വിവിധ ജില്ലകളിൽ ശക്തമായ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം (ഐഎംഡി) അറിയിച്ചു. ഉത്തര കന്നഡ, ബെല്ലാരി, ദാവൻഗെരെ, ഉഡുപ്പി, ചിക്കമഗളുരു, തുമകുരു, ദക്ഷിണ കന്നഡ, ചിക്കബല്ലാപുര, ഹാസൻ, കുടക്, മാണ്ഡ്യ, ബെംഗളൂരു റൂറൽ, ബെംഗളൂരു അർബൻ, മൈസൂരു, ചാമരാജ്നഗർ, രാമനഗര എന്നീ ജില്ലകളിൽ അടുത്ത മൂന്നു ദിവസത്തേക്ക് യെല്ലോ അലർട്ട് പ്രഖ്യാപിച്ചിട്ടുണ്ട്. ബെംഗളൂരുവിൽ കഴിഞ്ഞ രണ്ട് ദിവസമായി കനത്ത മഴ ലഭിക്കുന്നുണ്ട്.
ശനിയാഴ്ച രാത്രി പെയ്ത ശക്തമായ മഴയിൽ പ്രധാന റോഡുകളിൽ വെള്ളക്കെട്ടുകൾ രൂപപ്പെട്ടു. പലയിടങ്ങളിലും വൻ ഗതാഗതക്കുരുക്ക് അനുഭവപ്പെട്ടു. കാലാവസ്ഥ വകുപ്പിൻ്റെ റിപ്പോർട്ട് പ്രകാരം, ശനിയാഴ്ച 10.4 മില്ലിമീറ്റർ മഴ ബെംഗളൂരുവിൽ പെയ്തു. മഴയിൽ 15 മരങ്ങളും 44 ശിഖരങ്ങളും പൊട്ടിവീണു.
കല്യാൺ നഗർ, ഇലക്ട്രോണിക് സിറ്റി, ബൊമ്മസാന്ദ്ര തുടങ്ങിയ മേഖലകളിലെ റോഡുകളിലാണ് പ്രധാനമായും വെള്ളം കയറിയത്. കല്യാൺ നഗറിലെ സർവീസ് റോഡുകളിലും അണ്ടർപാസുകളിലുമടക്കം വെള്ളം കയറി. റോഡുകളിൽ വെള്ളക്കെട്ട് രൂക്ഷമായതോടെ ബൊമ്മസാന്ദ്ര വ്യവസായ മേഖലയ്ക്ക് സമീപം കനത്ത ഗതാഗതക്കുരുക്കായി. ഇവിടെ ഒരു മണിക്കൂറിലധികം വാഹനങ്ങളുടെ നീണ്ടനിര രൂപപ്പെട്ടിരുന്നു.
TAGS: BENGALURU | RAIN
SUMMARY: Heavy rain to lash in parts of city for next three days, yellow alert declared
