ബെംഗളൂരു: ഈജിപുര മേൽപ്പാല നിർമാണത്തിൽ കാലതാമസം വരുത്തിയതിനെ തുടർന്ന് കരാറുകാരന് പിഴ ചുമത്തി ബിബിഎംപി. മേൽപ്പാലത്തിന്റെ നിർമാണ പ്രവൃത്തി നിശ്ചിത സമയപരിധിക്കുള്ളിൽ പൂർത്തിയാക്കാൻ കരാറുകാരനോട് പലതവണ നിർദേശിച്ചിട്ടും പുരോഗതിയുണ്ടാകാത്തതിനെ തുടർന്നാണ് നടപടി. 25 ലക്ഷം രൂപയാണ് പിഴ ഈടാക്കിയത്.
ബി.എസ്.സി.പി.എൽ ഇൻഫ്രാസ്ട്രക്ചർ ലിമിറ്റഡിനാണ് മേൽപ്പാലത്തിന്റെ നിർമാണ കരാർ നൽകിയത്. കഴിഞ്ഞ നവംബറിലാണ് കമ്പനിക്ക് ബിബിഎംപി വർക്ക് ഓർഡർ നൽകിയത്. നിലവിൽ, 27 പൈലിംഗ് ജോലികൾ, മൂന്ന് പ്രീ-കാസ്റ്റ് സെഗ്‌മെൻ്റ് നിർമ്മാണങ്ങൾ, ഒമ്പത് പ്രീ-കാസ്റ്റ് സെഗ്‌മെൻ്റ് ലോഞ്ചിംഗുകൾ, റാമ്പ് നിർമ്മാണങ്ങൾ എന്നിവ ഇപ്പോഴും പൂർത്തിയായിട്ടില്ല.
മേൽപ്പാലത്തിനു താഴെയുള്ള റോഡ്, കാൽനട പാത, മഴവെള്ളം ഒഴുകിപ്പോകാനുള്ള അഴുക്കുച്ചാൽ നിർമാണം എന്നിവയും പുരോഗമിക്കുകയാണ്. എന്നാൽ പണി ഇഴഞ്ഞു നീങ്ങുന്നതിനാൽ ഈ റൂട്ടിലെ യാത്രക്കാർ ബുദ്ധിമുട്ടുകയാണ്. അടുത്ത ആറ് മാസത്തിനുള്ളിൽ കരാറുകാർ നിർമാണ ജോലികൾ പൂർത്തിയാക്കിയില്ലെങ്കിൽ കടുത്ത നടപടികൾ സ്വീകരിക്കുമെന്ന് ബിബിഎംപി ചീഫ് കമ്മീഷണർ മുന്നറിയിപ്പ് നൽകി.
TAGS: BENGALURU | BBMP
SUMMARY: Contractor fined Rs 25 lakh for slow pace of work on Ejipura flyover
