മഴ കാരണം ഇന്ത്യൻ പ്രീമിയർ ലീഗിലെ സൺ റൈസേഴ്സ് ഹൈദരാബാദ് – ഗുജറാത്ത് ടൈറ്റൻസ് മത്സരം ഉപേക്ഷിച്ചു. ഇരു ടീമുകളും ഓരോ പോയിന്റ് വീതം നേടി. ഇതോടെ ഒരു കളി ബാക്കിയിരിക്കേ 15 പോയിന്റുമായി സൺ റൈസേഴ്സ് ഹൈദരാബാദ് പ്ലേ ഓഫ് ഉറപ്പിച്ചു. ഗുജറാത്ത് നേരത്തേതന്നെ പ്ലേഓഫ് കടക്കാതെ പുറത്തായതാണ്.
ഹൈദരാബാദിലെ രാജീവ് ഗാന്ധി രാജ്യാന്തര സ്റ്റേഡിയത്തിൽ ഇന്നലെ വൈകീട്ട് മുതൽ ശക്തമായ മഴ പെയ്തിരുന്നു. മഴ തുടർന്നതോടെ അമ്പയർ ഇരു ടീമിന്റെയും ക്യാപ്റ്റൻമാരെ വിളിച്ച് കളി ഉപേക്ഷിക്കാൻ തീരുമാനിച്ചു. ഇതോടെ ഒരു പന്ത് പോലും എറിയാനാവാതെ മത്സരം ഉപേക്ഷിച്ചു. മത്സരം ഡൽഹി ക്യാപിറ്റൽസിന്റെ പ്ലേഓഫ് സാധ്യതകളെയും ഇല്ലാതാക്കി.
ഇനി റോയൽ ചലഞ്ചേഴ്സ് ബെംഗളൂരു – ചെന്നൈ സൂപ്പർ കിങ്സ് മത്സരത്തിൽ ചെന്നൈ ജയിച്ചാൽ പ്ലേ ഓഫ് ഉറപ്പിക്കാം. വൻ മാർജിനിൽ ജയിച്ചാൽ ബെംഗളൂരുവിനും കയറിപ്പറ്റാം. അതേസമയം ലഖ്നൗ സൂപ്പർ ജയന്റ്സിന് അടുത്ത മത്സരം വലിയ മാർജിനിൽത്തന്നെ വിജയിക്കേണ്ടത് അനിവാര്യമാണ്. നിലവിൽ 15 പോയിന്റുമായി മൂന്നാമതാണ് ഹൈദരാബാദ്. അടുത്ത കളിയിൽ പഞ്ചാബ് കിങ്സിനെ തോൽപ്പിക്കുകയും രാജസ്ഥാൻ റോയൽസ് കൊൽക്കത്ത നൈറ്റ് റൈഡേഴ്സിനോട് തോൽക്കുകയും ചെയ്താൽ ഹൈദരാബാദിന് പോയിന്റ് പട്ടികയിൽ രണ്ടാമതെത്താം. കൊൽക്കത്തയ്ക്കെതിരേ ജയിച്ചാൽ രാജസ്ഥാന് രണ്ടാം സ്ഥാനത്തോടെ പ്ലേഓഫിലെത്താം. ഹൈദരാബാദിൽ ഇതാദ്യമായാണ് ഐ.പി.എൽ. മത്സരം ഉപേക്ഷിക്കുന്നത്.
