നഗോയ: ഏഷ്യൻ ഗെയിംസിലെ ഗ്രീക്കോ-റോമൻ ഗുസ്തിയില്‍ ഇന്ത്യയുടെ സ്വർണത്തിനായുള്ള നീണ്ട കാത്തിരിപ്പ് തുടരുന്നു. പുരുഷന്മാരുടെ 97 കിലോഗ്രാം വിഭാഗം ഫൈനലില്‍ ജപ്പാന്റെ യൂറി നകസാറ്റോയോട് 0-4ന് തോറ്റതോടെ ഇന്ത്യൻ താരം നിതേഷ് സിവാചിന് വെള്ളിയില്‍ തൃപ്തിപ്പെടേണ്ടിവന്നു. ഫൈനലില്‍ തുടക്കത്തില്‍ തന്നെ നിതേഷ് രണ്ട്-ഓണ്‍-വണ്‍ ഗ്രിപ്പ് ഉപയോഗിച്ച്‌ ആക്രമണത്തിന് ശ്രമിച്ചെങ്കിലും നകസാറ്റോ കടുത്ത പ്രതിരോധം തീർത്തു.
മത്സരത്തിന്റെ ആദ്യ ഘട്ടത്തില്‍ നിതേഷിനെ പുറത്തേക്ക് തള്ളിയ ജാപ്പനീസ് താരം രണ്ട് പോയിന്റ് സ്വന്തമാക്കി. ഗ്രൗണ്ട് പൊസിഷനിലായ നിതേഷ് ശക്തമായ പ്രതിരോധം കാഴ്ചവച്ചെങ്കിലും നകസാറ്റോയ്ക്ക് ലീഡ് ഉയർത്താനായി. രണ്ടാം ഘട്ടത്തിലും നകസാറ്റോ സമ്മർദം തുടർന്നു. നിതേഷിനെ ബാലൻസ് തെറ്റിച്ച ശേഷം ടേക്ക്‌ഡൗണ്‍ നേടിയാണ് ജാപ്പനീസ് താരം ലീഡ് 4-0 ആക്കിയത്. മത്സരം അവസാനിക്കാൻ ഒരു മിനിറ്റ് മാത്രം ശേഷിക്കെ തിരിച്ചുവരാൻ നിതേഷ് ശ്രമിച്ചെങ്കിലും നകസാറ്റോയുടെ പ്രതിരോധം മറികടക്കാനായില്ല.
നിതേഷിന്റെ വെള്ളിയോടെ ഏഷ്യൻ ഗെയിംസിലെ ഗ്രീക്കോ-റോമൻ വിഭാഗത്തില്‍ ഇന്ത്യയുടെ സ്വർണത്തിനായുള്ള കാത്തിരിപ്പ് വീണ്ടും നീളുകയാണ്. 1962ലാണ് ഇന്ത്യ അവസാനമായി ഈ വിഭാഗത്തില്‍ ഏഷ്യൻ ഗെയിംസ് സ്വർണം നേടിയത്. ജക്കാർത്തയില്‍ മലവ സിങ് 52 കിലോഗ്രാം വിഭാഗത്തിലും ഗണപത് അന്ദല്‍ക്കർ 97 കിലോഗ്രാമിന് മുകളിലുള്ള വിഭാഗത്തിലും സ്വർണം നേടിയിരുന്നു.
SUMMARY: Asian Games: Silver for Nitesh Sivach in Greco-Roman 97kg
