പാലക്കാട്: കൊല്ലങ്കോട് വാഴപ്പുഴയില് മയക്കുവെടിവെച്ച് കമ്പിവേലിയില് നിന്ന് രക്ഷപ്പെടുത്തി കൂട്ടിലാക്കിയ പുലി ചത്തു. മണിക്കൂറുകറോളം കമ്പിവേലിയില് കുടുങ്ങി കിടന്ന പുലിയെ വെറ്ററിനറി സര്ജന് ഡോ.ഡേവിഡ് ഏബ്രഹാമിന്റെ നേതൃത്വത്തില് മയക്കുവെടി വച്ച് വീഴ്ത്തിയാണ് കൂട്ടിലാക്കിയത്. തുടര്ന്ന് നിരീക്ഷണത്തിലാക്കി ചികിത്സ നല്കി തുടങ്ങുന്നതിനിടെയാണ് പുലിക്ക് ജീവന് നഷ്ടപ്പെട്ടത്. ആന്തരിക രക്തസ്രാവമാണ് മരണകാരണമെന്നാണ് പ്രാഥമിക നിഗമനം.
വാഴപ്പുഴ സ്വദേശി ഉണ്ണികൃഷ്ണന്റെ പറമ്പിലാണ് രാവിലെ ഏഴ് മണിയോടെ പുലിയെ കണ്ടത്. തിരിച്ചിറങ്ങാന് പറ്റാത്തവിധം കുടുങ്ങി കിടന്ന പുലിയെ രക്ഷിക്കാന് വനംവകുപ്പ് ഉദ്യോഗസ്ഥര് സ്ഥലത്തെത്തുകയായിരുന്നു. ഏതാണ്ട് നാല് വയസ് പ്രായം വരുന്ന പെണ്പുലിയാണ് വേലിയില് കുടുങ്ങിയത്.
