ബെംഗളൂരു: സംസ്ഥാനത്തെ മെഡിക്കല്‍ കോളജുകളില്‍ സര്‍ക്കാര്‍ ക്വോട്ടയില്‍ 1122 അധിക സീറ്റുകള്‍ക്ക് കൂടി നാഷണല്‍ മെഡിക്കല്‍ കമ്മിഷന്‍ അനുമതി നല്‍കിയതായി മെഡിക്കല്‍ വിദ്യാഭ്യാസ മന്ത്രി ശരണ്‍ പ്രകാശ് പാട്ടീല്‍ പറഞ്ഞു. കൊപ്പാള്‍, ഗദഗ്, ചാമരാജ്നഗര്‍, കാര്‍വാര്‍, തുടങ്ങിയയിടങ്ങളിലെ വിദ്യാര്‍ഥികള്‍ക്ക് കൂടുതലായി അനുവദിച്ച സീറ്റുകള്‍ പ്രയോജനപ്പെടുമെന്നും മന്ത്രി അറിയിച്ചു. ഇത്രയധികം സീറ്റുകള്‍ ഒരു സംസ്ഥാനത്തിന് അനുവദിക്കുന്നത് റെക്കോഡാണെന്നും മന്ത്രി പറഞ്ഞു.ശനിയാഴ്ച വിധാന്‍സൗധയില്‍ വിളിച്ചുചേര്‍ത്ത വാര്‍ത്താ സമ്മേളനത്തിലാണ് ഇക്കാര്യം അറിയിച്ചത്.
2026-2027 അധ്യയന വര്‍ഷത്തേക്കാണിത്. നിലവില്‍ സംസ്ഥാനത്ത് സര്‍ക്കാര്‍ മേഖലയിലും സ്വകാര്യമേഖലയിലുമായുള്ള 72 കോളേജുകളിലായി 21,672 മെഡിക്കല്‍ സീറ്റുകളാണുള്ളത്. ഇത് 22,794 സീറ്റുകളായി ഉയരും. എംബിബിഎസ് കോഴ്‌സുകള്‍ക്കായി 495 കോടി രൂപയും മെഡിക്കല്‍ പിജി കോഴ്‌സുകള്‍ക്ക് 541 കോടി രൂപയും കേന്ദ്ര സര്‍ക്കാര്‍ ഗ്രാന്റ് അനുവദിച്ചതായും അദ്ദേഹം പറഞ്ഞു.
SUMMARY: 1122 more seats in government quota in medical colleges
