ചെന്നൈ: തമിഴ്നാട്ടിലെ തേനിയില്‍ 17 തടവുകാര്‍ ജയില്‍ ചാടി. ആണ്ടിപെട്ടിയിലെ ജില്ലാ ജയിലില്‍ നിന്നാണ് വിചാരണ തടവുകാര്‍ രക്ഷപ്പെട്ടത്. സുരക്ഷക്കുണ്ടായിരുന്ന ജയില്‍ ജീവനക്കാരനെ ആക്രമിച്ചാണ് ഇവര്‍ കടന്നുകളഞ്ഞതെന്നാണ് വിവരം. അപസ്മാരം ബാധിച്ചതായി അഭിനയിച്ചാണ് തടവുകാർ ജയിൽ ജീവനക്കാരെ കബളിപ്പിച്ചതെന്ന് തേനി പോലീസ് അറിയിച്ചു. സഹായിക്കാനായി ജീവനക്കാർ അടുത്തെത്തിയപ്പോൾ ഇവരെ ആക്രമിച്ചശേഷം തടവുകാർ രക്ഷപ്പെടുകയായിരുന്നുവെന്നാണ് വിവരം. ഇന്നലെയാണ് സംഭവം.
ലിങ്കം, രാജ സിംഗന്ധർ, കറുപ്പസാമി, ശിലംബരശൻ, തിരുപ്പതി, മെൻജിസുന്ദരം, സബരി, പൊൻ മുത്തു, നിജന്ത്, കാർത്തിക് രാജ, മുഗിലൻ, സെൽവ, തരുൺ, രാജ്കുമാർ, പ്രവീൺ, മുത്തു ഇളങ്കോ, രാജുവീൻ എന്നിവരാണ് രക്ഷപ്പെട്ട തടവുകാരെന്നാണ് റിപ്പോർട്ടുകൾ. ഇവരില്‍ പ്രവീണിനെ പിടികൂടിയതായി റിപ്പോര്‍ട്ടുണ്ട്.
രക്ഷപ്പെട്ടവര്‍ക്കായി പോലീസ് ഊര്‍ജിത അന്വേഷണം ആരംഭിച്ചിട്ടുണ്ട്. സംഭവത്തെ തുടർന്ന് തേനി ജില്ലാ പോലീസ് മേധാവി കെ.എസ്. പ്രവീൺ ഗൗതം ജയിലിലെത്തി പരിശോധന നടത്തി. രക്ഷപ്പെട്ടവരെ കണ്ടെത്തുന്നതിനായി പ്രത്യേക അന്വേഷണ സംഘങ്ങളെയും നിയോഗിച്ചു. രക്ഷപ്പെട്ടവര്‍ ഇടുക്കി വഴി കേരളത്തിലേക്ക് കടക്കാനുള്ള സാധ്യത മുന്‍നിര്‍ത്തി കേരള-തമിഴ്‌നാട് അതിര്‍ത്തിലെ ചെക്ക് പോസ്റ്റുകളില്‍ ജാഗ്രതാ നിര്‍ദേശം നല്‍കി. വിഴുപ്പുരം ഉള്‍പ്പെടെയുള്ള അയൽജില്ലകളിൽ പോലീസ് നിരീക്ഷണം ശക്തമാക്കിയിട്ടുണ്ട്. ഇവർ സ്വന്തം നാട്ടിലേക്ക് മടങ്ങാൻ സാധ്യതയുണ്ടെന്ന വിലയിരുത്തലിനെ തുടർന്ന് ജില്ലയിലുടനീളം വാഹനപരിശോധന കർശനമാക്കി.
SUMMARY: 17 prisoners escaped in Theni, Tamil Nadu, after attacking a prison official; high alert declared at the borders.
