ബെംഗളൂരു: നഗരത്തിൽ റോഡപകടങ്ങൾ കുറയ്ക്കുന്നതിനും ഗതാഗതനിയമങ്ങൾ കർശനമായി നടപ്പാക്കുന്നതിനുമായി ട്രാഫിക് പോലീസ് നടത്തിയ പ്രത്യേക പരിശോധനയിൽ മദ്യപിച്ച് വാഹനമോടിച്ചതിന് 369 കേസുകൾ രജിസ്റ്റർ ചെയ്തു. ഒക്ടോബർ 19 മുതൽ 25 വരെ ഒരാഴ്ച നീണ്ട പരിശോധനയിൽ നഗരത്തിലെ 53 ട്രാഫിക് പോലീസ് സ്റ്റേഷൻ പരിധികളിലായി 24,243 വാഹനങ്ങൾ പരിശോധിച്ചതായാണ് റിപ്പോർട്ട്.
മദ്യപിച്ച് വാഹനമോടിക്കുന്നവരെ കണ്ടെത്തുന്നതിനൊപ്പം അമിതവേഗത്തിൽ വാഹനമോടിക്കുന്നവർക്കെതിരെയും പോലീസ് നടപടി സ്വീകരിച്ചു. അമിതവേഗവുമായി ബന്ധപ്പെട്ട് 170 കേസുകൾ രജിസ്റ്റർ ചെയ്യുകയും 1.72 ലക്ഷം പിഴ ഈടാക്കുകയും ചെയ്തു.
മദ്യപിച്ചുള്ള ഡ്രൈവിങ്ങും അമിതവേഗവും റോഡപകടങ്ങളുടെ സാധ്യത വർധിപ്പിക്കുന്ന സാഹചര്യത്തിൽ ഇത്തരം നിയമലംഘനങ്ങൾ തടയുന്നതിനാണ് പരിശോധന ശക്തമാക്കിയത്. രാത്രികാലങ്ങളിലും തിരക്കേറിയ റോഡുകളിലും പരിശോധന തുടരുന്നതിലൂടെ അപകടസാധ്യത കുറയ്ക്കാനാകുമെന്നാണ് അധികൃതരുടെ പ്രതീക്ഷ.
SUMMARY: Action taken against 369 people for drunk driving in Bengaluru; traffic police intensify checks.
