ബെംഗളൂരു: വരൾച്ചയും മഴക്കുറവും മൂലം ജലവൈദ്യുതി ഉൽപാദനം കുറഞ്ഞ സാഹചര്യത്തിൽ വൈദ്യുതി ആവശ്യകത നിറവേറ്റാൻ കർണാടക 85 ലക്ഷം ടൺ അധിക കൽക്കരി ഉറപ്പാക്കി. റായ്ചൂർ മേഖലയിലെ റായ്ചൂർ, ബല്ലാരി, യർമാരസ് താപവൈദ്യുതി നിലയങ്ങൾക്ക് ആവശ്യമായ ഇന്ധന ലഭ്യത ഉറപ്പാക്കുന്നതിനാണ് നടപടി.
മഴക്കുറവ് കാരണം സംസ്ഥാനത്തെ ജലവൈദ്യുതി ഉൽപാദനം സാധാരണ നിലയേക്കാൾ ഗണ്യമായി കുറഞ്ഞിട്ടുണ്ട്. ഇതോടെ താപവൈദ്യുതി നിലയങ്ങളുടെ ഉൽപാദനം വർധിപ്പിക്കേണ്ട സാഹചര്യമുണ്ടായി. നേരത്തെ പ്രതിദിനം 70–80 ദശലക്ഷം യൂണിറ്റ് വൈദ്യുതി ഉൽപാദിപ്പിച്ചിരുന്ന താപനിലയങ്ങൾ ഇപ്പോൾ 100 ദശലക്ഷത്തിലധികം യൂണിറ്റ് വരെ ഉൽപാദിപ്പിക്കുന്ന സാഹചര്യമാണ് റിപ്പോർട്ട് ചെയ്യുന്നത്.
കൽക്കരി ലഭ്യത ഉറപ്പാക്കുന്നതിനായി കർണാടക പവർ കോർപ്പറേഷൻ ലിമിറ്റഡ് കേന്ദ്ര കൽക്കരി മന്ത്രാലയവുമായി നടത്തിയ ചർച്ചകളുടെ ഫലമായാണ് അധിക വിഹിതം ലഭിച്ചത്. ഭാരത് കോക്കിങ് കോൾ ലിമിറ്റഡ്, സെൻട്രൽ കോൾഫീൽഡ്സ് ലിമിറ്റഡ്, ഈസ്റ്റേൺ കോൾഫീൽഡ്സ് ലിമിറ്റഡ് തുടങ്ങിയ വിവിധ സ്ഥാപനങ്ങളിൽ നിന്നാണ് അധിക കൽക്കരി ലഭിച്ചത്.
സെപ്റ്റംബർ 23-ന് മൂന്ന് താപവൈദ്യുതി നിലയങ്ങളിൽ ഏകദേശം 1.8 ലക്ഷം ടൺ കൽക്കരി മാത്രമാണ് ശേഷിച്ചിരുന്നതെന്നും ഇത് ഉയർന്ന ഉൽപാദനനിരക്കിൽ ഏകദേശം മൂന്ന് ദിവസത്തേക്ക് മാത്രമേ ശഷിക്കുമായിരുന്നുവെന്നും റിപ്പോർട്ട് ഉണ്ടായിരുന്നു.
അതേസമയം, സംസ്ഥാനത്ത് നിലവിൽ വൈദ്യുതി നിയന്ത്രണം ഏർപ്പെടുത്തേണ്ട സാഹചര്യമില്ലെന്ന് ഊർജമന്ത്രി കെ.ജെ. ജോർജ് വ്യക്തമാക്കിയിട്ടുണ്ട്. ഏകദേശം 1,000 മെഗാവാട്ടിന്റെ വൈദ്യുതി കുറവ് നേരിടുന്നുണ്ടെങ്കിലും വിവിധ സംസ്ഥാനങ്ങളിൽ നിന്ന് വൈദ്യുതി വാങ്ങിയും ആഭ്യന്തര ഉൽപാദനം വർധിപ്പിച്ചും ആവശ്യം നിറവേറ്റാനുള്ള നടപടികൾ തുടരുകയാണെന്ന് മന്ത്രി പറഞ്ഞു.
SUMMARY: 8.5 million tonnes of additional coal for power generation
