ശ്രീനഗർ: കശ്മീരില്‍ പട്രോളിങ്ങിനിടെ കാണാതായ രണ്ട് പോലീസ് ഉദ്യോഗസ്ഥരെ കൊല്ലപ്പെട്ട നിലയില്‍ കണ്ടെത്തി. കിഷ്ത്വാര്‍ ജില്ലയില്‍ നിന്നാണ് വെടിയുണ്ടകള്‍ ഏറ്റ നിലയില്‍ രണ്ട് സ്‌പെഷ്യല്‍ പോലീസ് ഓഫീസര്‍മാരുടെ (എസ് പി ഒ) മൃതദേഹങ്ങള്‍ ഇന്നു പുലര്‍ച്ചെ കണ്ടെടുത്തത്. ബുധനാഴ്ച മുതൽ കാണാതായ ഉദ്യോഗസ്ഥരുടെ മൃതദേഹങ്ങളാണ് കണ്ടെത്തിയത്. കിഷ്ത്വാറിലെ ദച്ചൻ മേഖലയിലുള്ള കിയാർ ഗ്രാമത്തിൽ സ്പെഷ്യൽ ഓപ്പറേഷൻസ് ഗ്രൂപ്പിൽ സേവനമനുഷ്ഠിച്ചിരുന്ന ബാബി ചന്ദ് (57), രശ്പാൽ കുമാർ (45) എന്നിവരാണ് കൊല്ലപ്പെട്ടത്.
ബുധനാഴ്ച തങ്ങളുടെ ക്യാമ്പിൽ നിന്നും ധർണ-മർവയിലെ സൈനിക പോസ്റ്റിലേക്ക് പട്രോളിംഗിനായി പോകുന്നതിനിടെയാണ് ഇരുവരെയും കാണാതായത്. മൊബൈൽ നെറ്റ്‌വർക്ക് ലഭ്യമല്ലാത്ത ഉൾവനമേഖലയിലൂടെയുള്ള യാത്രയ്‌ക്കിടെ വെടിയൊച്ച കേട്ടതായി റിപ്പോർട്ടുകളുണ്ടായിരുന്നു. ഉദ്യോഗസ്ഥർ തിരികെ എത്താത്തതിനെത്തുടർന്ന് പോലീസും സുരക്ഷാ സേനയും സംയുക്തമായി നടത്തിയ വ്യാപക തിരച്ചിലിലാണ് വ്യാഴാഴ്ച പുലർച്ചെ മൃതദേഹങ്ങൾ കണ്ടെത്തിയത്.
മൃതദേഹങ്ങൾക്ക് സമീപത്തുനിന്നും ഇവരുടെ സർവീസ് തോക്കുകൾ കണ്ടെത്താനായിട്ടില്ല. കൊടുംവനവും മലയോരങ്ങളും നിറഞ്ഞ ഈ പ്രദേശത്ത് ഭീകരർക്കായി സുരക്ഷാ സേന തിരച്ചിൽ ഊർജിതമാക്കിയിട്ടുണ്ട്. ബുധനാഴ്ച ഉച്ചയ്‌ക്ക് കുൽഗാം ജില്ലയിൽ സിആർപിഎഫ് ചെക്ക്പോസ്റ്റിന് നേരെയുണ്ടായ വെടിവെപ്പിൽ മൂന്ന് ജവാന്മാർക്ക് പരിക്കേറ്റതിന് പിന്നാലെയാണ് കിഷ്ത്വാറിലെ ഈ ദാരുണ സംഭവം റിപ്പോർട്ട് ചെയ്യുന്നത്.
SUMMARY: Two policemen who went missing while on patrol in Kashmir were killed
