ബെംഗളൂരു: നഗരത്തിലെ ഗതാഗതക്കുരുക്ക് കുറയ്ക്കുന്നതിലും തെക്കൻ ബെംഗളൂരുവിലെ യാത്രാസൗകര്യങ്ങൾ മെച്ചപ്പെടുത്തുന്നതിലും നിർണായകമായേക്കുന്ന നമ്മ മെട്രോയുടെ പിങ്ക് ലൈനിന്റെ ആദ്യഘട്ടം -7.5 കിലോമീറ്റർ എലിവേറ്റഡ് പാത ഇന്ന് പ്രധാനമന്ത്രി നരേന്ദ്ര മോദി ഇന്ന് നാടിന് സമർപ്പിക്കും. ഉച്ചയ്ക്ക് 12.30 ന് താവരക്കരെ സ്റ്റേഷനിൽ പ്രധാനമന്ത്രി ഫ്ലാഗ് ഓഫ് ചെയ്ത ശേഷം ഐഐഎംബി ബിലേക്കഹള്ളി സ്റ്റേഷനിലേക്ക് മെട്രോയിൽ യാത്ര ചെയ്യും. ഐഐഎംബി ഓഡിറ്റോറിയത്തിലാണ് ഉദ്ഘാടന ചടങ്ങ്. ഉദ്ഘാടനത്തിന് ശേഷം നാളെ (നവംബർ 14, 2026) രാവിലെ 6 മണി മുതൽ ഈ പാത പൊതുജനങ്ങൾക്കായി തുറന്നുകൊടുക്കും
ഏറെ വാഹനത്തിരക്കേറിയ ബെന്നാർഘട്ട റോഡിനു മുകളിലൂടെ കടന്നുപോകുന്ന 7.5 കിലോമീറ്റർ പാത തുറക്കുന്നതോടെ ഈ ഭാഗങ്ങളിലെ ഗതാഗതക്കുരുക്കിനു പരിഹാരമാകുമെന്നാണ് പ്രതീക്ഷ. പിങ്ക് ലൈനിന്റെ ആകെ നീളം 21.26 കിലോമീറ്ററാണ്. ഇതിൽ 7.5 കിലോമീറ്റർ ഉയർന്ന പാതയും ശേഷിക്കുന്ന 13.76 കിലോമീറ്റർ ഭൂഗർഭ പാതയുമാണ്. ഭൂഗർഭപാത നാഗവാര വരെയാണ് നീളുന്നത്. പാതയിലെ ശ്രദ്ധേയമായ ഒന്ന് ജയദേവ ആശുപത്രി സ്റ്റേഷനാണ്. ഇവിടെ നിലവിലുള്ള യെല്ലോ ലൈനുമായി യാത്രക്കാർക്ക് ബന്ധപ്പെടാൻ കഴിയും. ഇതോടെ തെക്കൻ ബെംഗളൂരുവിലെ വിവിധ പ്രദേശങ്ങളിൽനിന്ന് ഇലക്ട്രോണിക് സിറ്റി, ബൊമ്മസാന്ദ്ര തുടങ്ങിയ ഭാഗങ്ങളിലേക്ക് മെട്രോ വഴി യാത്ര ചെയ്യുന്നത് കൂടുതൽ എളുപ്പമാകും.
നിലവില്‍ ബെംഗളൂരു മെട്രോയുടെ പ്രവര്‍ത്തന ശൃംഖല 96.1 കിലോമീറ്ററാണ്. പിങ്ക് ലൈനിലെ 7.5 കിലോമീറ്റര്‍ പാത കൂടി പ്രവര്‍ത്തനക്ഷമമാകുന്നതോടെ ഇത് 103.6 കിലോമീറ്ററായി ഉയരും. നഗരത്തിലെ മെട്രോ ശൃംഖല 100 കിലോമീറ്റര്‍ പിന്നിടുന്ന നിര്‍ണായക ഘട്ടമാണിത്. ദൈര്‍ഘ്യം വര്‍ധിക്കുന്നതിനൊപ്പം നഗരത്തിന്റെ വിവിധ ഭാഗങ്ങളിലേക്ക് പൊതുഗതാഗത സൗകര്യം വ്യാപിപ്പിക്കാനും പുതിയ പാത സഹായിക്കും. ആദ്യഘട്ടം ഉദ്ഘാടനം ചെയ്യുന്നതോടെ പിങ്ക് ലൈനിന്റെ മുഴുവന്‍ സര്‍വീസും ആരംഭിക്കില്ല. നാഗവാര വരെയുള്ള ഭൂഗര്‍ഭ പാതയില്‍ നിര്‍മാണവും അനുബന്ധ സാങ്കേതിക ജോലികളും തുടരുകയാണ്. ഈ ഭാഗം പൂര്‍ത്തിയാക്കി ആവശ്യമായ പരിശോധനകളും സുരക്ഷാ അനുമതികളും ലഭിച്ച ശേഷമായിരിക്കും പൂര്‍ണ സര്‍വീസ് ആരംഭിക്കുക. എംജി റോഡ്, ശിവാജിനഗര്‍, കന്റോണ്‍മെന്റ് തുടങ്ങിയ പ്രധാന മേഖലകളിലേക്കും പാത കണക്റ്റിവിറ്റി നല്‍കും.
SUMMARY: Namma Metro Pink Line will be dedicated to the nation by Prime Minister Narendra Modi today
