ബെംഗളൂരു: ദ്രാവിഡ ഭാഷാ ട്രാൻസിലേറ്റേർസ് അസോസിയേഷൻ (ഡിബിടിഎ) യുടെ നേതൃത്വത്തിൽ മലയാളത്തില്‍ നിന്നും കന്നഡയിലേക്ക് വിവര്‍ത്തനം ചെയ്ത നാല് കൃതികളുടെ പ്രകാശനം മൈസൂരുവില്‍ നടന്നു. കുവെമ്പു നഗറിലെ കലാസുരുചി ഓഡിറ്റോറിയത്തിൽ നടന്ന ചടങ്ങില്‍ ടി.ഡി. രാമകൃഷ്ണന്റെ ‘അന്ധർ–ബധിരർ–മൂകർ’, ജനമ്മ കുഞ്ഞുണ്ണിയുടെ ‘ശിവകാമി’, ഇ.പി. പവിത്രന്റെ ‘ഇബ്നു ബത്തൂത്തായുടെ ലോക യാത്രകൾ’, സി.എൻ. ശ്രീകണ്ഠൻ നായരുടെ ‘നാടകത്രയം’ എന്നീ കൃതികളുടെ കന്നഡ പരിഭാഷകൾ ദ്രാവിഡ ഭാഷാ ട്രാൻസിലേറ്റേഴ്സ് അസ്സോസിയേഷൻ പ്രസിഡന്റായ ഡോ. സുഷമ ശങ്കറാണ് പ്രകാശനം ചെയ്തത്. ഈ നാലു മലയാളകൃതികളുടേയും വിവർത്തനം ഡിബിടിഎ സെക്രട്ടറി കെ. പ്രഭാകരൻ ആണ് നിര്‍വഹിച്ചത്.
പുസ്തകങ്ങളെക്കുറിച്ച് ശശിധർ ഡോംഗ്രെ, ചാന്ദ്നി, ശൈലജ വേണുഗോപാൽ എന്നിവർ സംസാരിച്ചു. ബി.ശങ്കർ, പ്രഫ. രാകേഷ്, റെബിൻ രവീന്ദ്രൻ എന്നിവർ നേതൃത്വം നൽകി. കെ. പ്രഭാകരന്‍ നന്ദി പറഞ്ഞു.
SUMMARY: 4 more Malayalam works translated into Kannada under the leadership of the Dravidian Language Translators Association
