ന്യൂഡല്‍ഹി: രാജ്യത്തെ 12 സംസ്ഥാനങ്ങളിലായി പ്രവര്‍ത്തിക്കുന്ന 32 വ്യാജ സര്‍വകലാശാലകളുടെ പട്ടിക പുറത്ത് വിട്ട് യൂണിവേഴ്‌സിറ്റി ഗ്രാന്റ്‌സ് കമ്മീഷന്‍ (യു.ജി.സി). ഇത്തരം സ്ഥാപനങ്ങളില്‍ പ്രവേശനം നേടരുതെന്നും വിദ്യാര്‍ഥികള്‍ക്ക് യു.ജി.സി മുന്നറിയിപ്പ് നല്‍കി. ഈ സ്ഥാപനങ്ങള്‍ നല്‍കുന്ന ബിരുദങ്ങള്‍ക്ക് തൊഴില്‍ ആവശ്യങ്ങള്‍ക്കോ ഉന്നത വിദ്യാഭ്യാസത്തിനോ നിയമപരമായ സാധുത ഉണ്ടായിരിക്കില്ലെന്ന് അധികൃതര്‍ മുന്നറിയിപ്പ് നല്‍കി. യുജിസി നിയമത്തിലെ സെക്ഷന്‍ 2(f), 3 എന്നിവ പ്രകാരം കേന്ദ്രസംസ്ഥാന സര്‍ക്കാരുകളുടെ അംഗീകാരമില്ലാതെയാണ് ഇവ പ്രവര്‍ത്തിക്കുന്നത്.
രാജ്യതലസ്ഥാനമായ ഡല്‍ഹിയിലാണ് ഏറ്റവും കൂടുതല്‍ വ്യാജ സര്‍വകലാശാലകള്‍ കണ്ടെത്തിയത്. 12 സ്ഥാപനങ്ങളാണ് ഡല്‍ഹിയില്‍ മാത്രം ഇത്തരത്തില്‍ പ്രവര്‍ത്തിക്കുന്നത്. നാല് വ്യാജ സര്‍വകലാശാലകളുമായി ഉത്തര്‍പ്രദേശാണ് തൊട്ടുപിറകില്‍. ആന്ധ്രാപ്രദേശ്, കര്‍ണാടക, കേരളം, മഹാരാഷ്ട്ര, പശ്ചിമ ബംഗാള്‍ തുടങ്ങിയ സംസ്ഥാനങ്ങളിലും പോണ്ടിച്ചേരിയിലും രണ്ട് വീതം വ്യാജ സര്‍വകലാശാലകള്‍ പട്ടികയിലുണ്ട്.
കേരളത്തില്‍ ഇന്റര്‍നാഷണല്‍ ഇസ്ലാമിക് യൂണിവേഴ്‌സിറ്റി ഓഫ് പ്രോഫെറ്റിക് മെഡിസിന്‍ (ഐ.ഐ.യു.പി.എം) കോഴിക്കോട്, സെന്റ് ജോണ്‍സ് യൂണിവേഴ്‌സിറ്റി എന്നിവയാണ് വ്യാജ സര്‍വകലാശാലകളുടെ പട്ടികയില്‍ ഉള്‍പ്പെട്ടത്. ഈ സ്ഥാപനങ്ങള്‍ക്ക് കേന്ദ്ര സര്‍ക്കാരിന്റെയോ സംസ്ഥാന സര്‍ക്കാരിന്റെയോ അംഗീകാരമില്ലെന്നും പ്രവേശനം തേടുന്നതിന് മുന്‍പ് വിദ്യാര്‍ത്ഥികള്‍ സ്ഥാപനങ്ങളുടെ അംഗീകാര നില കൃത്യമായി പരിശോധിക്കണമെന്ന് കമ്മീഷന്‍ നോട്ടീസില്‍ വ്യക്തമാക്കി.
SUMMARY: UGC releases list of 32 fake universities in the country; two in Kerala
