ഉദയ്പൂർ: തെന്നിന്ത്യൻ സിനിമാ ലോകം ഒന്നടങ്കം കാത്തിരുന്ന ആ വിവാഹ ചിത്രങ്ങള് ഒടുവില് പുറത്ത്. അഭ്യൂഹങ്ങള്ക്ക് വിരാമമിട്ട് നടൻ വിജയ് ദേവരകൊണ്ടയും നടി രശ്മിക മന്ദാനയും വിവാഹിതരായി. കുടുംബത്തിന്റെയും അടുത്ത സുഹൃത്തുക്കളുടെയും സാന്നിദ്ധ്യത്തിലായിരുന്നു വിവാഹം. ഇപ്പോഴിതാ വിവാഹ ചിത്രങ്ങള് വിജയ് ദേവരകൊണ്ട തന്റെ സോഷ്യല് മീഡിയ പേജില് പങ്കുവച്ചിരിക്കുകയാണ്. ഒപ്പം രശ്മികയെ കുറിച്ചുള്ള ഹൃദയസ്പർശിയായ കുറിപ്പും പങ്കുവച്ചു.
“ഒരു ദിവസം, ഞാൻ അവളെ വല്ലാതെ മിസ്സ് ചെയ്തു. അവള് കൂടെ ഉണ്ടായിരുന്നെങ്കില് എന്റെ ദിവസം നന്നാകുമായിരുന്ന തോന്നല് ഉണ്ടാക്കുന്ന വിധത്തില് അവളെ ഞാൻ വല്ലാതെ മിസ്സ് ചെയ്തു. അവള് എന്റെ എതിർവശത്ത് ഇരുന്നിരുന്നെങ്കില് എന്റെ ഭക്ഷണം കൂടുതല് ആരോഗ്യകരമാകുമെന്ന് തോന്നി. അവള് എന്നോടൊപ്പം വ്യായാമം ചെയ്തിരുന്നെങ്കില് എന്റെ വ്യായാമങ്ങള് കൂടുതല് രസകരവും ആയാസ രഹിതമാകുമെന്നും തോന്നി. എനിക്ക് അവളെ ആവശ്യമായി തോന്നി. അങ്ങനെ, ഞാൻ എന്റെ ഉറ്റ സുഹൃത്തിനെ..എന്റെ ഭാര്യയെ കണ്ടെത്തി’, എന്നായിരുന്നു വിജയ് ദേവരകൊണ്ട ഫോട്ടോകള്ക്കൊപ്പം കുറിച്ചത്.
അതേസമയം തീർത്തും സ്വകാര്യമായ ചടങ്ങില് ഏകദേശം 100 പേർക്ക് മാത്രമാണ് ക്ഷണം ലഭിച്ചിരുന്നത്. മാർച്ച് നാലിന് സിനിമാ മേഖലയിലെ പ്രമുഖർക്കായി ഹൈദരാബാദിലെ താജ് കൃഷ്ണയില് വച്ച് വിവാഹസല്ക്കാരം സംഘടിപ്പിക്കുമെന്നും റിപ്പോർട്ടുകളുണ്ട്. 2018ല് ‘ഗീതാഗോവിന്ദം’ എന്ന ചിത്രത്തിലാണ് രശ്മികയും വിജയും ആദ്യമായി ഒരുമിച്ച് അഭിനയിച്ചത്. അതിനുശേഷമാണ് ഇരുവരും പ്രണയത്തിലാണെന്ന അഭ്യൂഹങ്ങള് പുറത്തുവന്നത്.
പിന്നീട് 2019ല് പുറത്തിറങ്ങിയ ‘ഡിയർ കോമ്രേഡ്’ എന്ന ചിത്രത്തിലും അവർ ഒരുമിച്ച് അഭിനയിച്ചിരുന്നു. അതിനുശേഷമാണ് താരങ്ങളുടെ ബന്ധത്തെക്കുറിച്ചുള്ള അഭ്യൂഹങ്ങള് ശക്തമാകുന്നത്. വിവാഹത്തിന് ഏതാനും മാസങ്ങള്ക്ക് മുമ്പ് ഒരു സ്വകാര്യ ചടങ്ങില് രശ്മികയും വിജയും വിവാഹനിശ്ചയം നടത്തിയതായും വാർത്തകളുണ്ടായിരുന്നു.
