ബെംഗളൂരു: നഗരത്തിൽ വ്യാജ കറൻസി നിർമിച്ച് വിവിധ സംസ്ഥാനങ്ങളിൽ വിതരണം ചെയ്തുവെന്നാരോപിക്കുന്ന സംഘത്തിലെ ഏഴ് പേരെ ചാമരാജ്പേട്ട് പോലീസ് അറസ്റ്റ് ചെയ്തു. 21.7 ലക്ഷം മുഖവിലയുള്ള വ്യാജ 500 ൻ്റെ നോട്ടുകളാണ് പിടിച്ചെടുത്തത്.
നോട്ടുകൾ അച്ചടിക്കാൻ ഉപയോഗിച്ചിരുന്ന കമ്പ്യൂട്ടർ, ഉയർന്ന നിലവാരത്തിലുള്ള പ്രിന്റർ, ലാമിനേറ്റർ, കട്ടിങ് യന്ത്രം തുടങ്ങിയ ഉപകരണങ്ങളും പോലീസ് കണ്ടെത്തി.
സെപ്റ്റംബർ 14ന് ബി.ജി.എസ് ഫ്ലൈഓവറിന് സമീപം വാഹന പരിശോധനയ്ക്കിടെ 3,000 വ്യാജ 500 നോട്ടുകളുമായി രണ്ട് പേരെ പോലീസ് പിടികൂടിയതോടെയാണ് അന്വേഷണം ആരംഭിച്ചത്. ഇവരെ ചോദ്യം ചെയ്തതിനെ തുടർന്ന് ചെന്നൈയിലും തെലങ്കാനയിലെ രംഗറെഡ്ഡി ജില്ലയിലും അന്വേഷണം വ്യാപിപ്പിച്ചു.
തുടർന്നുള്ള പരിശോധനയിൽ തമിഴ്നാട്ടിലെ കൃഷ്ണഗിരി ജില്ലയിലുള്ള ഒരു വീട്ടിൽ വ്യാജ നോട്ടുകൾ അച്ചടിക്കുന്നതിനുള്ള സംവിധാനമാണ് കണ്ടെത്തിയത്. അവിടെ നിന്ന് 1,337 വ്യാജ നോട്ടുകളും പിടിച്ചെടുത്തു.
സത്തയ്യ, മുരുകേശൻ, ഗോവിന്ദൻ, ബർകത്ത്, ശർവൺ, ലക്ഷ്മണ, കൃഷ്ണ എന്നിവരാണ് അറസ്റ്റിലായതെന്ന് പോലീസ് അറിയിച്ചു. സംഘത്തിൽ തമിഴ്നാട്, തെലങ്കാന സ്വദേശികൾ ഉൾപ്പെട്ടിട്ടുണ്ടെന്നാണ് റിപ്പോർട്ട്.
കർണാടക, തമിഴ്നാട്, തെലങ്കാന എന്നിവിടങ്ങളിൽ ഏകദേശം രണ്ട് മാസമായി സംഘം വ്യാജ നോട്ടുകൾ പ്രചരിപ്പിച്ചിരുന്നതായാണ് പ്രാഥമിക അന്വേഷണത്തിൽ കണ്ടെത്തിയത്. വ്യാജ നോട്ടുകൾ നിർമിക്കുന്ന രീതി മെച്ചപ്പെടുത്താൻ സംഘം ഇന്റർനെറ്റിൽ നിന്നുള്ള വിവരങ്ങൾ ഉപയോഗിച്ചിരുന്നതായും പോലീസ് കണ്ടെത്തി.
സംഘവുമായി ബന്ധപ്പെട്ട് നാല് പേരെ കൂടി കണ്ടെത്താനുള്ള അന്വേഷണം തുടരുകയാണ്.
SUMMARY: Fake currency racket in Bengaluru: Seven arrested.
