ബെംഗളൂരു: ഓൺലൈനിൽ ഓർഡർ നൽകിയ സാധനങ്ങൾ ഡെലിവറി ചെയ്യാനെത്തിയ ഏജന്‍റ് ഉപഭോക്താവിനെ ആക്രമിച്ചതായി പരാതി. ബെംഗളൂരു കോറമംഗലയിലാണ് സംഭവം. കോറമംഗല എട്ടാം ബ്ലോക്കിലെ താമസക്കാരനും എഞ്ചിനീയറും മലയാളിയുമായ പോൾ ജെ. വിതയിലിന് നേരെയാണ് ആക്രമണമുണ്ടായത്.
പോൾ ബ്ലിംഗിറ്റ് വഴി സാധനങ്ങൾ ഓർഡർ ചെയ്തിരുന്നു. എന്നാല്‍ പുലർച്ചെ രണ്ടോടെ ഡെലിവറി ചെയ്യാനെത്തിയ ഏജന്‍റിന് വിലാസം തെറ്റി മറ്റൊരിടത്ത് പോയി. തുടർന്ന് അല്പം കഴിഞ്ഞ് ഇ‍യാൾ പോളിന്‍റെ വിലാസത്തിലെത്തിയിരുന്നു. പിന്നാലെ ഇരുവരും തമ്മിൽ വാക്കുതർക്കമുണ്ടായി. ഇതിനിടെ യുവാവ് പോളിനെ ആക്രമിച്ചതായാണ് പരാതി. അസഭ്യം പറയുകയും, മുഖത്ത് അടിക്കുകയും, സാധനങ്ങൾ വലിച്ചെറിയുകയും, നാശനഷ്ടങ്ങൾ വരുത്തുകയും ചെയ്തതായി പരാതിയില്‍ പറയുന്നു.
പ്രതിയെ കണ്ടെത്താനായി കോറമംഗല പോലീസ് അന്വേഷണം ആരംഭിച്ചിട്ടുണ്ട്. ഓൺലൈൻ ആപ്പായ ബ്ലിംഗിറ്റിൽ നിന്ന് യുവാവിന്‍റെ വിശദാംശങ്ങൾ തേടിയതായി പോലീസ് അറിയിച്ചു.
SUMMARY: Malayali attacked; Case filed against online delivery agent
.
