പത്തനംതിട്ട: ശബരിമല സ്വർണക്കൊള്ള കേസില്‍ പ്രതിയായ മുൻ തിരുവിതാംകൂർ ദേവസ്വം പ്രസിഡന്റ് എ. പത്മകുമാറിന് സിപിഎമ്മിന്റെ നോട്ടീസ്. തപാല്‍ വഴിയാണ് പത്തനംതിട്ട ജില്ല നേതൃത്വം നോട്ടീസ് നല്‍കിയത്. സിപിഎം സംസ്ഥാന നേതൃത്വത്തിന്റെ അറിവോടെയാണ് പത്തനംതിട്ട ജില്ല നേതൃത്വം നോട്ടീസ് നല്‍കിയതെന്നാണ് വിവരം.
പാർട്ടിക്ക് അവമതിപ്പുണ്ടാക്കിയതില്‍ വിശദീകരണം നല്‍കണമെന്നാണ് നോട്ടീസില്‍ പറയുന്നത്. വിശദീകരണം തേടിയ ശേഷം പാർട്ടി എ. പത്മകുമാറിനെതിരെ നടപടി സ്വീകരിക്കുമെന്നാണ് വിവരം. പത്മകുമാറിനെ പത്തനംതിട്ട ജില്ല കമ്മിറ്റിയുടെ വാട്സാപ്പ് ഗ്രൂപ്പില്‍ നിന്നും കഴിഞ്ഞ ദിവസം പുറത്താക്കിയിരുന്നു.
ശബരിമല സ്വർണക്കൊള്ള കേസില്‍ മൂന്നര മാസത്തോളം ജയിലില്‍ കിടന്ന പത്മകുമാർ അടുത്തിടെയാണ് ജാമ്യത്തില്‍ പുറത്തിറങ്ങിയത്. ജയിലില്‍ ആയിട്ടും പാർട്ടി നടപടികളൊന്നും സ്വീകരിച്ചിരുന്നില്ല.
SUMMARY: Sabarimala gold theft; CPM sends notice to A Padmakumar
