ബെംഗളൂരു: ഉത്തര കന്നഡ ജില്ലയിൽ ശക്തമായ മഴ തുടരുന്നതിനിടെ വിവിധ ഭാഗങ്ങളിൽ മണ്ണിടിച്ചിലും വെള്ളക്കെട്ടും റിപ്പോർട്ട് ചെയ്തു. സാണിക്കട്ടയ്ക്ക് സമീപം കുന്നിടിഞ്ഞ് മണ്ണും കല്ലുകളും റോഡിലേക്ക് പതിച്ചതോടെ ഗതാഗതം മണിക്കൂറുകളോളം തടസ്സപ്പെട്ടു. ദേശീയ-സംസ്ഥാന പാതകളിലൂടെ സഞ്ചരിച്ച വാഹനങ്ങൾ നീണ്ടനിരയായി കുടുങ്ങിയതോടെ യാത്രക്കാർക്ക് വലിയ ബുദ്ധിമുട്ടാണ് നേരിട്ടത്. റോഡിൽ വീണ മണ്ണും കല്ലുകളും നീക്കം ചെയ്യാൻ പൊതുമരാമത്ത് വകുപ്പ്, ദേശീയപാത അതോറിറ്റി, പോലീസ് എന്നിവരുടെ നേതൃത്വത്തിൽ അടിയന്തര നടപടികൾ ആരംഭിച്ചു.
കനത്ത മഴയ്ക്കിടെ നെല്ലെകേരി പ്രദേശത്തെ ഒരു സ്കൂൾ കെട്ടിടത്തിന്റെ മേൽക്കൂരയിലേക്ക് വലിയ പാറ ഉരുണ്ടുവീണതും ആശങ്ക പരത്തി. സംഭവം നടക്കുമ്പോൾ വിദ്യാർഥികൾ സ്കൂളിലുണ്ടായിരുന്നെങ്കിലും ആര്ക്കും പരുക്കേൽക്കാതിരുന്നതിനാൽ വൻ ദുരന്തമാണ് ഒഴിവായത്. മുൻകരുതൽ എന്ന നിലയിൽ വിദ്യാർഥികളെ സുരക്ഷിത സ്ഥലത്തേക്ക് മാറ്റുകയും കെട്ടിടത്തിന്റെ സുരക്ഷ പരിശോധിക്കാൻ അധികൃതർ നിർദേശം നൽകുകയും ചെയ്തു.
തുടർച്ചയായ മഴയെ തുടർന്ന് താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെടുകയും ചില ചെറുപാലങ്ങൾക്കും ഗ്രാമീണ റോഡുകൾക്കും കേടുപാടുകൾ സംഭവിക്കുകയും ചെയ്തിട്ടുണ്ട്. നദികളിലെയും തോടുകളിലെയും ജലനിരപ്പ് ഉയരുന്നതിനാൽ അപകടസാധ്യതയുള്ള പ്രദേശങ്ങളിലെ ജനങ്ങൾ ജാഗ്രത പാലിക്കണമെന്ന് ജില്ലാ ഭരണകൂടം മുന്നറിയിപ്പ് നൽകി. ദുരന്തനിവാരണ സേനയും അഗ്നിരക്ഷാസേനയും അടിയന്തര സാഹചര്യങ്ങൾ നേരിടാൻ സജ്ജമാക്കിയിട്ടുണ്ട്.
മലഞ്ചെരിവുകളിലൂടെയുള്ള യാത്രകൾ പരമാവധി ഒഴിവാക്കണമെന്നും രാത്രികാല യാത്രകളിൽ പ്രത്യേക ശ്രദ്ധ പുലർത്തണമെന്നും അധികൃതർ നിർദേശിച്ചു. കനത്ത മഴ തുടരാൻ സാധ്യതയുള്ളതിനാൽ മണ്ണിടിച്ചിൽ സാധ്യതയുള്ള പ്രദേശങ്ങളിൽ നിരീക്ഷണം ശക്തമാക്കിയിട്ടുണ്ട്. ആവശ്യമായാൽ കൂടുതൽ നിയന്ത്രണങ്ങളും യാത്രാ വിലക്കുകളും ഏർപ്പെടുത്തുമെന്നും ജില്ലാ ഭരണകൂടം അറിയിച്ചു.
കാലാവസ്ഥാ വകുപ്പിന്റെ മുന്നറിയിപ്പ് പ്രകാരം തീരദേശ കർണാടകയിലും മലനാട് മേഖലയിലും അടുത്ത മണിക്കൂറുകളിലും ശക്തമായ മഴ തുടരാൻ സാധ്യതയുണ്ട്. അതിനാൽ ഔദ്യോഗിക മുന്നറിയിപ്പുകൾ പാലിക്കണമെന്നും അപകടസാധ്യതയുള്ള സ്ഥലങ്ങളിൽ നിന്ന് വിട്ടുനിൽക്കണമെന്നും പൊതുജനങ്ങളോട് അധികൃതർ അഭ്യർഥിച്ചു.
SUMMARY: Heavy rains in Uttara Kannada; landslides disrupt road traffic, rocks fall on top of school building
