കനത്ത മഴയും മണ്ണിടിച്ചിലും; ബെംഗളൂരു–മംഗളൂരു റൂട്ടില്‍ റെയിൽ ഗതാഗതം തടസ്സപ്പെട്ടു 

ബെംഗളൂരു: കനത്ത മഴയെ തുടർന്ന് പശ്ചിമഘട്ടത്തിലെ യെഡകുമാരി–ശിരിബാഗിലു റെയിൽവേ സ്റ്റേഷനുകൾക്കിടയിൽ ശനിയാഴ്ച രാത്രിയുണ്ടായ മണ്ണിടിച്ചിലിനെ തുടർന്ന് റെയിൽ ഗതാഗതം തടസപ്പെട്ടു. ട്രാക്കിലേക്ക് മണ്ണും പാറക്കല്ലുകളും മരങ്ങളും പതിച്ചതിനെ തുടർന്ന് ബെംഗളൂരു–മംഗളൂരു റെയിൽപാതയിലെ മിക്ക സർവീസുകളും തടസ്സപ്പെട്ടു. പാത നന്നാക്കാനുള്ള ശ്രമങ്ങൾ പുരോഗമിക്കുകയാണ്.

Kindly note the Cancellation of Train Services due to landslip on the railway track between Yedakumari – Shrivagilu stations of the Mysuru division.#SWRupdates pic.twitter.com/biETHwuMEs

— South Western Railway (@SWRRLY) August 2, 2026

മംഗളൂരു–യശ്വന്ത്പൂർ റൂട്ടിലെ ചില ട്രെയിൻ സർവീസുകൾ റദ്ദാക്കുകയും മറ്റ് ചില ട്രെയിനുകൾ ഭാഗികമായി റദ്ദാക്കുകയോ വഴിതിരിച്ചുവിടുകയോ ചെയ്തതായി ദക്ഷിണ പശ്ചിമ റെയിൽവേ അറിയിച്ചു. ട്രാക്ക് പുനഃസ്ഥാപിക്കുന്നതുവരെ സർവീസുകൾ പൂർണമായി സാധാരണ നിലയിലാകില്ലെന്നും അധികൃതർ വ്യക്തമാക്കി.

Kindly note the Diversion of Train Services due to landslip on the railway track between Yedakumari – Shrivagilu stations of the Mysuru division.#SWRupdates pic.twitter.com/4GfFRGKUkD

— South Western Railway (@SWRRLY) August 2, 2026

ഉരുൾപൊട്ടൽ ഉണ്ടായ സ്ഥലത്ത് രക്ഷാസാമഗ്രികളുമായി പ്രത്യേക ട്രെയിനും എൻജിനീയറിങ് സംഘവും എത്തിച്ചിട്ടുണ്ട്. മണ്ണും പാറക്കല്ലുകളും നീക്കം ചെയ്യുന്നതിനുള്ള പ്രവർത്തനങ്ങൾ യുദ്ധകാലാടിസ്ഥാനത്തിൽ പുരോഗമിക്കുകയാണ്. മഴ തുടരുന്നതിനാൽ പുനഃസ്ഥാപന പ്രവർത്തനങ്ങൾ വെല്ലുവിളി നേരിടുന്നതായും റെയിൽവേ അധികൃതർ അറിയിച്ചു.

ബെംഗളൂരു–മംഗളൂരു റൂട്ടിൽ യാത്ര ചെയ്യാൻ പദ്ധതിയിട്ടിരുന്ന യാത്രക്കാർ യാത്ര പുറപ്പെടുന്നതിന് മുമ്പ് ട്രെയിൻ സർവീസുകളുടെ നിലവിലെ സ്ഥിതി പരിശോധിക്കണമെന്ന് ദക്ഷിണ പശ്ചിമ റെയിൽവേ അഭ്യർഥിച്ചു. കനത്ത മഴ തുടരുന്നതിനാൽ പശ്ചിമഘട്ട മേഖലയിലെ റെയിൽപാതകളിൽ 24 മണിക്കൂറും നിരീക്ഷണം ശക്തമാക്കിയിട്ടുണ്ടെന്നും അധികൃതർ അറിയിച്ചു.
SUMMARY: Heavy rains and landslides disrupt Bengaluru-Mangalore rail traffic