സ്വാശ്രയ കോഴ്‌സുകൾ തുടങ്ങാൻ എൻഒസി വേണ്ടെന്ന് തീരുമാനിച്ചത് കാലതാമസം ഒഴിവാക്കാൻ; മന്ത്രി റോജി എം ജോൺ

യുജിസി മാനദണ്ഡം പ്രകാരം ഓട്ടോണമസ് കോളജുകളിൽ പുതിയ കോഴ്‌സ് ആരംഭിക്കാൻ സർവകലാശാലയുടെയും സർക്കാരിന്റെയും അനുമതി വേണ്ട. എന്നാൽ കേരളത്തിൽ ഇതല്ല സ്ഥിതിയെന്ന് മന്ത്രി വിശദീകരിച്ചു. ഇത് അക്കാദമിക് സ്വയംഭരണ തത്വത്തെ നിരാകരിക്കുന്നതാണെന്ന് മന്ത്രി പറഞ്ഞു. സർക്കാരിന്റെ തീരുമാനം അക്കാദമിക് സ്വയംഭരണം പ്രോത്സാഹിപ്പിക്കുന്നതിനുള്ളതാണ്. സർക്കാരിന്റെ അനുമതി തേടുന്നതു മൂലം കോഴ്സുകൾ ആരംഭിക്കാൻ കാലതാമസം നേരിടുന്നത് അക്കാദമിക് തത്വങ്ങളെ അട്ടിമറിക്കുകയാണ്. അതിനാലാണ് സർക്കാർ അനുമതിക്ക് പകരം സർവകലാശാല അനുമതി മതിയെന്ന് തീരുമാനിച്ചതെന്ന് മന്ത്രി പറഞ്ഞു.

പുതിയ തീരുമാനം വലിയ മാറ്റം കൊണ്ടുവരും. പ്രതിപക്ഷ നേതാവിന്റെ ആരോപണങ്ങൾ വസ്തുതകൾ മനസ്സിലാക്കാതെയാണ്. കാലഘട്ടത്തിന് അനുസരിച്ചുള്ള മാറ്റം കോഴ്സുകളിൽ വരണം. പല കോഴ്‌സുകളിലും സീറ്റ് ഒഴിഞ്ഞുകിടക്കുകയാണ്. വിദ്യാർഥികൾക്ക് പഠിക്കാനുള്ള സൗകര്യം സംസ്ഥാനത്ത് ഒരുക്കി നൽകേണ്ടതുണ്ട്. അതിന് വേണ്ടിയാണ് പുതിയ തീരുമാനം എന്നും മന്ത്രി പറഞ്ഞു.

വിദ്യാർഥികൾക്ക് നല്ല അവസരങ്ങൾ നൽകാനുള്ള തീരുമാനമാണ് സംസ്ഥാന സർക്കാർ കൈകൊണ്ടിരിക്കുന്നത്. സ്വയംഭരണ എയ്ഡഡ്-സ്വാശ്രയ കോളജുകൾ സ്വന്തം നിലയ്ക്ക് കോഴ്‌സ് ആരംഭിക്കുമ്പോൾ സർക്കാരിന് എന്താണ് ബാധ്യത. ഇതിനെതിരെയുള്ള ആരോപണങ്ങൾ വിദ്യാർഥികൾ രക്ഷപ്പെടാൻ പാടില്ലെന്നതാണെന്നും പിന്തിരിപ്പൻ സമീപനമാണെന്നും മന്ത്രി കുറ്റപ്പെടുത്തി.
SUMMARY: Decided not to require NOC to start self-financing courses to avoid delays; Minister Roji M John