കൊച്ചി: ശബരിമലയിലെ മില്മ നെയ്യ് ഇടപാടിലെ ക്രമക്കേടില് വിജിലന്സ് അന്വേഷണത്തിന് ഉത്തരവിട്ട് ഹൈക്കോടതി. നെയ്യ് ഇടപാട് ക്രമക്കേടുമായി ബന്ധപ്പെട്ട ആരോപണങ്ങള് പ്രഥമദൃഷ്ട്യാ ഗൗരവതരമാണെന്ന് കോടതി നിരീക്ഷിച്ചു. വിഷയം അന്വേഷിക്കാന് പ്രത്യേക അന്വേഷണ സംഘത്തെ നിയോഗിക്കാന് വിജിലന്സ് ഡയറക്ടര്ക്ക് ഹൈക്കോടതി ദേവസ്വം ബെഞ്ച് നിര്ദേശം നല്കി.
കേസെടുത്ത് ഒരു മാസത്തിനുള്ളില് അന്വേഷണം പൂര്ത്തിയാക്കണമെന്നാണ് കോടതി നിര്ദേശം. ഇതിനിടെ, അന്വേഷണ പുരോഗതി റിപ്പോര്ട്ട് സമര്പ്പിക്കണമെന്നും ഹൈക്കോടതി നിര്ദേശിച്ചിട്ടുണ്ട്. ഇ-ടെന്ഡര് ഉപേക്ഷിച്ച് ഉയര്ന്ന വിലയ്ക്ക് മില്മയില് നിന്ന് നെയ്യ് വാങ്ങിയതില് സംശയമുണ്ടെന്നും കമ്മീഷണറുടെ എതിര്പ്പ് അവഗണിച്ചാണ് മില്മയില് നിന്ന് നെയ്യ് വാങ്ങാനുള്ള തീരുമാനമെന്നും കോടതി ചൂണ്ടിക്കാട്ടി. 1.61 ലക്ഷം ലിറ്റര് നെയ്യ് മുഴുവന് സന്നിധാനത്ത് എത്തിയോ എന്നതിലും സംശയം.
ലഭിച്ച നെയ്യിന്റെ ഗുണനിലവാരം സ്വതന്ത്രമായി പരിശോധിച്ചില്ല. ഗതാഗതം, കണക്കുകള്, ബാച്ച് നമ്പറുകള് എന്നിവയില് ഗുരുതര പൊരുത്തക്കേടുകളുണ്ടെന്നും കോടതി ചൂണ്ടിക്കാട്ടി. താഴ്ന്ന നിലവാരത്തിലുള്ള നെയ്യ് ഉപയോഗിച്ചിരിക്കാനുള്ള സാധ്യതയും അന്വേഷിക്കണം. ദേവസ്വം ബോര്ഡിന് കോടികളുടെ സാമ്പത്തിക നഷ്ടമുണ്ടാകാമെന്നാണ് നിരീക്ഷണം. ഒരു മാസത്തിനകം അന്വേഷണ പുരോഗതി റിപ്പോര്ട്ട് ഹൈക്കോടതിയില് നല്കണം. ഹൈക്കോടതി ദേവസ്വം ബെഞ്ചിന്റേതാണ് ഇടക്കാല ഉത്തരവ്.
SUMMARY: Sabarimala Milma Ghee Irregularity: High Court Orders Vigilance Probe
