വായനയുടെയും കലയുടെയും വസന്തോത്സവം: ബുക്ക് ബ്രഹ്‌മ പുസ്തകമേളയ്ക്കും കലാവിപണിക്കും തുടക്കമായി

ബെംഗളൂരു: ബുക്ക് ബ്രഹ്‌മ സാഹിത്യോത്സവം 2026′ -ന്റെ ഭാഗമായി നടക്കുന്ന പുസ്തകമേളയ്ക്കും കലാവിപണിക്കും (ഫ്ലീ മാര്‍ക്കറ്റ്) തുടക്കമായി. സാഹിത്യോത്സവ വേദിയായ ബെംഗളൂരു കോറമംഗലയിലുള്ള സെന്റ് ജോണ്‍സ് ഓഡിറ്റോറിയം കാമ്പസില്‍ വെള്ളിയാഴ്ച രാവിലെ നടന്ന ഉദ്ഘാടന ചടങ്ങില്‍ ഡെക്കാന്‍ ഏവിയേഷന്‍, എയര്‍ ഡെക്കാന്‍ സ്ഥാപകന്‍ ക്യാപ്റ്റന്‍ ജി. ആര്‍. ഗോപിനാഥ്,പ്രശസ്ത നടിയും എഴുത്തുകാരിയുമായ സുമന്‍ നഗര്‍ക്കര്‍, നാഡോജ പ്രൊഫ. ഹംപ നാഗരാജയ്യ, കന്നഡ വികസന അതോറിറ്റി പ്രസിഡന്റ് പ്രൊഫ. പുരുഷോത്തമ ബിളിമലെ, ചിന്തകന്‍ പ്രൊഫ. എം. എസ്. ആശാദേവി, കര്‍ണാടക പബ്ലിഷേഴ്സ് അസോസിയേഷന്‍ പ്രസിഡന്റ് ഡോ. വസുന്ധര ഭൂപതി എന്നിങ്ങനെ വിവിധ മേഖലകളില്‍ നിന്നുള്ള പ്രമുഖ വ്യക്തികളും സാഹിത്യകാരന്മാരും മുഖ്യാതിഥികളായി പങ്കെടുത്തു.

ഇത്തവണത്തെ സാഹിത്യോത്സവത്തിന്റെ പ്രധാന സവിശേഷതകളില്‍ ഒന്നാണ് പുസ്തകമേളയും ഫ്ലീ ആന്‍റ് ഹാൻഡിക്രാഫ്റ്റ്സ് മാർക്കറ്റും. പുസ്തകപ്രേമികളെയും പ്രസാധകരെയും ഒരു കുടക്കീഴില്‍ അണിനിരത്തുന്ന മേളയില്‍ മലയാളത്തില്‍ നിന്നും ഡിസി ബുക്സ് അടക്കം ഇന്ത്യയിലെ 15 ഓളം പ്രമുഖ പുസ്തകപ്രസിദ്ധീകരണ സ്ഥാപനങ്ങളുടെ സ്റ്റാളുകള്‍ അണിനിരക്കുന്നുണ്ട്. വിവര്‍ത്തന കൃതികള്‍ അടക്കം മലയാള സാഹിത്യത്തിലെ മികച്ച പുസ്തകങ്ങള്‍ മേളയെ സമ്പന്നമാക്കുന്നുണ്ട്.

ഫ്ലീ ആന്‍റ് ഹാൻഡിക്രാഫ്റ്റ്സ് മാർക്കറ്റില്‍ കരകൗശല വസ്തുക്കള്‍ കൈത്തറി ഉൽപ്പന്നങ്ങള്‍ എന്നിവയുടെ പ്രദർശനാവും വിൽപ്പനയും ഉണ്ടായിരിക്കും, കൂടാതെ വിവിധ വിഭവങ്ങള്‍ സജ്ജമാക്കിയ പ്രത്യേക ഫുഡ് കോർട്ടും ഒരുക്കിയിട്ടുണ്ട്.

മേളയിലെ സാംസ്‌കാരിക പരിപാടികളുടെ ഭാഗമായി ഗായിക ശില്‍പ മുഡ്ബിയും രാമക്കയും ചേര്‍ന്ന് അവതരിപ്പിക്കുന്ന ‘രാമക്കയും ഞാനും’ (Ramakka and I) എന്ന പ്രത്യേക പരിപാടി വെള്ളിയാഴ്ച അരങ്ങേറി. വടക്കൻ കർണാടകയിലെ ജോഗ പാരമ്പര്യവും അതുമായി ബന്ധപ്പെട്ട ഇരുവരുടെയും ജീവിതാനുഭവങ്ങളുമായിരുന്നു  പരിപാടിയുടെ പശ്ചാത്തലം. വരും ദിവസങ്ങളില്‍ രാമചന്ദ്ര ഹഡപദ് ആൻഡ് എൻസെംബിൾ, സുനിധി ഗണേഷ് വിത്ത് ദ ഗിഗ് മാൻ ലൈവ് ബാൻഡ് എന്നി സംഗീതപരിപാടികൾ നടക്കും.

സാഹിത്യോത്സവത്തിലെ പ്രധാന ഇനമായ  സാഹിത്യപരിപാടികൾ ഓഗസ്റ്റ് 21 മുതൽ 23 വരെ നടക്കും. ഇന്ത്യയുടെ വിവിധ ഭാഗങ്ങളിൽ നിന്നുള്ള എഴുത്തുകാരും വായനക്കാരും ചിന്തകരും മൂന്ന് ദിവസങ്ങളിലായി സംവാദങ്ങൾക്കും ചർച്ചകൾക്കും സാഹിത്യാന്വേഷണത്തിനുമായി ഒന്നിച്ചുകൂടും.

ഒൻപത് വ്യത്യസ്ത വേദികളിലായി മൂന്ന് ദിവസങ്ങളിൽ 200-ലധികം ക്യൂറേറ്റഡ് സെഷനുകൾ നടക്കും. 400-ലധികം എഴുത്തുകാർ, കലാകാരന്മാർ, പ്രസാധകർ, വിവിധ വിഷയവിദഗ്ധർ എന്നിവർ കന്നഡ, തെലുങ്ക്, തമിഴ്, മലയാളം, ഇംഗ്ലീഷ് ഭാഷകളെ പ്രതിനിധീകരിച്ച് പങ്കെടുക്കും. സാഹിത്യം, സമൂഹം, സംസ്കാരം, വിവർത്തനം, പ്രസാധനം, കലകൾ തുടങ്ങിയ വിഷയങ്ങളിലായിരിക്കും സംവാദങ്ങൾ.

മലയാളത്തില്‍ നിന്നും എന്‍.എസ് മാധവന്‍, സക്കറിയ, കെ. ആര്‍ മീര, ബെന്ന്യാമിന്‍, ഇ.പി രാജഗോപാലന്‍, കെ. പി രാമനുണ്ണി, സുധാകരന്‍ രാമന്തളി, സന്തോഷ് ഏച്ചിക്കാനം പി വി ഷാജികുമാര്‍, ലിപിന്‍ രാജ്, എം. കെ ഹരികുമാര്‍, ജേക്കബ് എബ്രഹാം ഉള്‍പ്പെടെയുള്ളവര്‍ പങ്കെടുക്കുന്നുണ്ട്. കൂടാതെ ബെംഗളൂരുവില്‍ നിന്നുള്ള മലയാളി എഴുത്തുകാരും സാഹിത്യവിരുന്നിന്റെ ഭാഗമാകും.

പ്രഭാഷകരുടെ പൂർണ്ണ പട്ടികയും പരിപാടികളുടെ വിശദാംശങ്ങളും www.bookbrahmalitfest.com–ല്‍ ലഭ്യമാണ്.
SUMMARY: Spring Festival of Reading and Art: Book Brahma Book Fair and Art Market Begins