ബെംഗളൂരു: ആന്ധ്രാപ്രദേശിലെ ഹിന്ദുപുരിൽ നിന്ന് ബെംഗളൂരുവിലേക്ക് കൊണ്ടുപോകുകയായിരുന്ന ആറ് ടണ്ണിലേറെ ബീഫ് ചിക്കബല്ലാപുര ജില്ലയിലെ മഞ്ചേനഹള്ളിക്ക് സമീപം പോലീസ് പിടികൂടി. ബുധനാഴ്ച പുലർച്ചെയാണ് നടപടി.
രാവിലെ ആറുമണിയോടെ 112 അടിയന്തര ഹെൽപ്‌ലൈനിൽ ലഭിച്ച വിവരത്തിന്റെ അടിസ്ഥാനത്തിലാണ് പോലീസ് പരിശോധന നടത്തിയത്. ഹിന്ദുപുരിൽ നിന്ന് ബെംഗളൂരുവിലേക്ക് മാംസം കൊണ്ടുപോകുന്നുവെന്നായിരുന്നു ലഭിച്ച വിവരം. പ്രാദേശിക ഗോസംരക്ഷണ സംഘടന പ്രവർത്തകർ വാഹനങ്ങളുടെ നീക്കം പിന്തുടർന്ന് തത്സമയ ലൊക്കേഷൻ വിവരങ്ങൾ പോലീസിന് കൈമാറുകയായിരുന്നു.
തുടർന്ന് പോലീസ് സംഘം മഞ്ചേനഹള്ളിക്ക് സമീപം രണ്ട് ചരക്ക് വാഹനങ്ങൾ പരിശോധിച്ചു. വാഹനങ്ങളിൽ ചാക്കുകളിലാക്കി സൂക്ഷിച്ചിരുന്ന മാംസം തക്കാളി നിറച്ച പെട്ടികൾക്കും മുളക് ചാക്കുകൾക്കും അടിയിൽ ഒളിപ്പിച്ച നിലയിലായിരുന്നു. അതിർത്തി പരിശോധന ഒഴിവാക്കുന്നതിനായാണ് ഇത്തരത്തിൽ മറച്ചുവെച്ചതെന്നാണ് പോലീസിന്റെ പ്രാഥമിക നിഗമനം.
പിടികൂടിയ മാംസത്തിന്റെ ഉറവിടം, കൊണ്ടുവന്ന വഴി, ലക്ഷ്യസ്ഥലം എന്നിവ സംബന്ധിച്ച് പോലീസ് അന്വേഷണം ആരംഭിച്ചു. രണ്ട് വാഹനങ്ങളും കസ്റ്റഡിയിലെടുത്തിട്ടുണ്ട്. സംഭവവുമായി ബന്ധപ്പെട്ട് വാഹനങ്ങളിലുണ്ടായിരുന്നവരെ ചോദ്യം ചെയ്തുവരുന്നു. മാംസം കടത്തിയതിന്റെ പിന്നിലെ ശൃംഖലയെക്കുറിച്ചും അന്വേഷണം തുടരുന്നുണ്ട്.
SUMMARY: Over six tonnes of illegally smuggled beef seized in Chikkaballapura; two vehicles in custody
