ബെംഗളൂരു: നഗരത്തിൽ അടുത്ത ദിവസങ്ങളിലും ഇടിയോടുകൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ മുന്നറിയിപ്പ്. കഴിഞ്ഞ ദിവസങ്ങളിൽ പെയ്ത ശക്തമായ മഴയെ തുടർന്ന് നഗരത്തിന്റെ വിവിധ ഭാഗങ്ങളിൽ വെള്ളക്കെട്ടും ഗതാഗത തടസ്സവും റിപ്പോർട്ട് ചെയ്തിരുന്നു.
മഴയ്ക്കൊപ്പം ശക്തമായ കാറ്റ് വീശിയതിനെ തുടർന്ന് ചിലയിടങ്ങളിൽ മരങ്ങളും മരക്കൊമ്പുകളും റോഡിലേക്ക് വീണതും ഗതാഗതത്തെ ബാധിച്ചു.
ഹെന്നൂർ, ദൊഡ്ഡനെകുണ്ടി, ഐ.ടി.പി.എൽ, കസ്തൂരിനഗർ, ഇന്ദിരാനഗർ തുടങ്ങിയ മേഖലകളിൽ മഴയെ തുടർന്ന് വെള്ളക്കെട്ട് രൂപപ്പെട്ടിരുന്നു. ശിവാനന്ദ സർക്കിൾ, ഹൂഡി തുടങ്ങിയ അടിപ്പാതകളിലും വെള്ളം കയറിയത് യാത്രക്കാരെ ദുരിതത്തിലാക്കി.
താഴ്ന്ന പ്രദേശങ്ങളിലും വെള്ളക്കെട്ട് പതിവായി ഉണ്ടാകുന്ന റോഡുകളിലും മഴ ശക്തമായാൽ ഗതാഗതം വീണ്ടും മന്ദഗതിയിലാകാൻ സാധ്യതയുണ്ട്.
മഴക്കാലത്ത് മരങ്ങൾ വീഴുന്നതിനും വൈദ്യുതി തടസ്സപ്പെടുന്നതിനുമുള്ള സാധ്യത കണക്കിലെടുത്ത് അധികൃതരും മുൻകരുതൽ നടപടികൾ സ്വീകരിക്കുന്നുണ്ട്.
മഴ തുടരുന്ന സാഹചര്യത്തിൽ വാഹനമോടിക്കുന്നവർ ജാഗ്രത പാലിക്കണമെന്നും വെള്ളക്കെട്ടുള്ള അടിപ്പാതകളിലൂടെയും താഴ്ന്ന റോഡുകളിലൂടെയും യാത്ര ചെയ്യുമ്പോൾ പ്രത്യേക ശ്രദ്ധ പുലർത്തണമെന്നും അധികൃതർ നിർദേശിക്കുന്നു.
SUMMARY : Rain accompanied by thunder likely to continue in Bengaluru: Alert issued.
