പത്തനംതിട്ട: പമ്പയുടെ തീരങ്ങളെ ആവേശത്തിലാഴ്ത്തുന്ന ആറന്മുള ഉതൃട്ടാതി ജലമേള ഇന്ന്. ഉപരാഷ്ട്രപതി സി.പി. രാധാകൃഷ്ണൻ ഉച്ചയ്ക്ക് 1.30ന് ജലമേള ഉദ്ഘാടനം ചെയ്യും.
33 വര്‍ഷത്തിന് ശേഷമാണ് ഒരു ഉപരാഷ്ട്രപതി ആറന്മുള ജലമേളയില്‍ പങ്കെടുക്കുന്നത്. സത്രം കോമ്പൗണ്ടില്‍ നടക്കുന്ന ഉദ്ഘാടന ചടങ്ങില്‍ ഗവര്‍ണര്‍ രാജേന്ദ്ര വിശ്വനാഥ് ആര്‍ലേകര്‍ അധ്യക്ഷത വഹിക്കും. ആഭ്യന്തരമന്ത്രി രമേശ് ചെന്നിത്തല, ജലവിഭവ മന്ത്രി മോൻസ് ജോസഫ്, ആന്റോ ആന്റണി എം.പി, അബിൻ വർക്കി എം.എൽ.എ, പള്ളിയോട സേവാസംഘം പ്രസിഡന്റ് കെ.വി.സാംബദേവൻ എന്നിവർ പങ്കെടുക്കും.
നിശ്ചലദൃശ്യങ്ങളും ഹെലികോപ്റ്റർ അഭ്യാസപ്രകടനവും ജലമേളയുടെ ഭാഗമായി ഒരുക്കിയിട്ടുണ്ട്. ഉപരാഷ്ട്രപതിയുടെ ഉദ്ഘാടനത്തിന് ശേഷം ജലഘോഷയാത്ര ആരംഭിക്കും. 2.30ഓടെ ഉപരാഷ്ട്രപതി മടങ്ങും. തുടർന്ന് വൈകിട്ട് 3 മണിയ്ക്ക് മത്സര വള്ളംകളിക്ക് തുടക്കമാകും.ഇത്തവണ 50 പള്ളിയോടങ്ങളാണ് മത്സരത്തിൽ പങ്കെടുക്കുന്നത്. 51 പള്ളിയോടങ്ങൾ ജലഘോഷയാത്രയിൽ അണിനിരക്കും. ഓതറ പള്ളിയോടം മത്സരത്തിൽ പങ്കെടുക്കില്ല. റാന്നി പള്ളിയോടവും ഇത്തവണ മത്സരത്തിനില്ല. മത്സരത്തിൽ പങ്കെടുക്കുന്ന പള്ളിയോടങ്ങളെ എ, ബി ബാച്ചുകളായി തിരിക്കും. ബി ബാച്ചിൽ 16 പള്ളിയോടങ്ങളുണ്ടാകും.
അഷ്ടമിരോഹിണി വള്ളസദ്യ സെപ്റ്റംബര്‍ നാലിന് ക്ഷേത്രമുറ്റത്ത് നടക്കുമെന്ന് പള്ളിയോട സേവ സംഘം ഭാരവാഹികള്‍ അറിയിച്ചു.
SUMMARY: Aranmula Uthratathi Jal Mela today; 51 churches will participate
