ചെന്നൈ: തമിഴ് സിനിമാ ലോകത്തെ പ്രിയദമ്പതികളായ സൂര്യയും ജ്യോതികയും തങ്ങളുടെ ഇരുപതാം വിവാഹവാർഷികം ആഘോഷിച്ചു. വിദേശത്ത് വച്ച്‌ പരമ്പരാഗത ക്രിസ്ത്യൻ രീതിയിലുള്ള ചർച്ച്‌ വെഡ്ഡിംഗിലൂടെയാണ് ഇരുവരും വീണ്ടും വിവാഹപ്രതിജ്ഞ ചൊല്ലിയത്. വെള്ള വസ്ത്രങ്ങളില്‍ അതിമനോഹരമായാണ് ചടങ്ങില്‍ ദമ്പതികള്‍ പങ്കെടുത്തത്. ജ്യോതിക ഗൗണും സൂര്യ വെള്ള ടക്സീഡോയുമാണ് ധരിച്ചിരുന്നത്.
ചടങ്ങിന്റെ മനോഹരമായ വീഡിയോ ഇൻസ്റ്റാഗ്രാമിലൂടെ ജ്യോതിക ആരാധകരുമായി പങ്കുവെച്ചിട്ടുണ്ട്. മക്കളുടെ കൈപിടിച്ചാണ് സൂര്യയും ജ്യോതികയും വിവാഹവേദിയിലേക്ക് എത്തിയത്. വെളുത്ത ഗൗണില്‍ വധുവായി എത്തിയ ജ്യോതികയെ കണ്ട നിമിഷം സൂര്യയുടെ കണ്ണുകളില്‍ ആനന്ദക്കണ്ണീർ നിറഞ്ഞു. നടന്റെ സഹോദരൻ കാർത്തിയും കുടുംബത്തോടൊപ്പം ഈ സുപ്രധാന ചടങ്ങില്‍ സന്നിഹിതനായിരുന്നു.
‘ദ് സീക്വല്‍ – 20 വർഷത്തെ സ്നേഹവും പോരാട്ടവും’ എന്നാണ് വീഡിയോയ്ക്ക് ജ്യോതിക നല്‍കിയ മനോഹരമായ അടിക്കുറിപ്പ്. അപൂർണതകളുടെയും വിട്ടുവീഴ്ചകളുടെയും പരസ്പരം മനസ്സിലാക്കലുകളുടെയും ആഘോഷമായാണ് ഇരുവരും ഈ വാഗ്ദാന പുതുക്കലിനെ കാണുന്നത്. ഒരു കാലത്ത് യാഥാർത്ഥ്യത്തില്‍ നിന്ന് അകലെയാണെന്ന് കരുതിയ സ്വപ്നം ഇന്ന് തന്റെ ജീവിതകാലം മുഴുവൻ ആഗ്രഹിക്കുന്ന യാഥാർത്ഥ്യമായി മാറിയെന്ന് താരം വ്യക്തമാക്കി.
SUMMARY: Suriya and Jyothika get married again with their children as witnesses
