ഡല്ഹി: ചീഫ് ഇലക്ഷൻ കമ്മീഷണർ (CEC) ജ്ഞാനേഷ് കുമാറിന്റെ രാജി ആവശ്യപ്പെട്ട് ന്യൂഡല്ഹിയിലെ ജന്തർ മന്തറില് പ്രതിഷേധിച്ച വിദ്യാർഥി-ബഹുജന സംഘടനാ പ്രവർത്തകരെയും പ്രമുഖ നേതാക്കളെയും ഡല്ഹി പോലീസ് കസ്റ്റഡിയിലെടുത്തു. ഓള് ഇന്ത്യ സ്റ്റുഡന്റ്സ് അസോസിയേഷൻ (AISA) ഉള്പ്പെടെയുള്ള സംഘടനകളുടെ നേതൃത്വത്തിലായിരുന്നു പ്രതിഷേധ സമരം സംഘടിപ്പിച്ചത്.
വോട്ടർ പട്ടിക പരിഷ്കരണവുമായി ബന്ധപ്പെട്ട് തിരഞ്ഞെടുപ്പ് കമ്മീഷന്റെ പ്രവർത്തനങ്ങളില് ക്രമക്കേട് ആരോപിച്ചായിരുന്നു സമരം. പ്രതിഷേധത്തിന് മുൻകൂട്ടി അനുമതി വാങ്ങിയിരുന്നില്ലെന്ന് ഡല്ഹി പോലീസ് അറിയിച്ചു. തുടർന്ന് ജന്തർ മന്തറിലേക്കുള്ള വഴികള് ബാരിക്കേഡുകള് വെച്ച് അടയ്ക്കുകയും സമരക്കാരെ ബലം പ്രയോഗിച്ച് നീക്കുകയും ചെയ്തു.
സി.പി.ഐ (എം.എല്) ലിബറേഷൻ ജനറല് സെക്രട്ടറി ദിപങ്കർ ഭട്ടാചാര്യ, ആക്ടിവിസ്റ്റ് യോഗേന്ദ്ര യാദവ്, എ.ഐ.എസ്.എ ദേശീയ അധ്യക്ഷ നേഹ ബോറ, അഞ്ജലി ഭരദ്വാജ്, അഭിഭാഷകൻ പ്രശാന്ത് ഭൂഷണ് തുടങ്ങിയ പ്രമുഖർ സമരത്തില് പങ്കെടുത്തു. ഇവരില് ദിപങ്കർ ഭട്ടാചാര്യ, യോഗേന്ദ്ര യാദവ്, നേഹ ബോറ എന്നിവരെയടക്കം പോലീസ് കസ്റ്റഡിയിലെടുത്ത് നീക്കി.
രാജ്യവ്യാപകമായി നടക്കുന്ന പ്രതിഷേധങ്ങളുടെ ഭാഗമായി അസം, ചണ്ഡീഗഡ്, പട്ന എന്നിവിടങ്ങളിലും ചീഫ് ഇലക്ഷൻ കമ്മീഷണർക്കെതിരെ പ്രതിഷേധ പ്രകടനങ്ങള് നടന്നു. അസമില് കോണ്ഗ്രസ് സംസ്ഥാന പ്രസിഡന്റ് ഗൗരവ് ഗൊഗോയ് അടക്കമുള്ള നേതാക്കളെയും പോലീസ് കസ്റ്റഡിയിലെടുത്തിട്ടുണ്ട്.
SUMMARY: Opposition stages nationwide protest against the Election Commission; scuffle at Jantar Mantar
