ബെംഗളൂരു: ട്രെയിന് കാത്തുനിന്ന യാത്രക്കാരന് മെട്രോ ട്രാക്കിലേക്ക് വീണു. രാജാജിനഗർ മെട്രോ സ്റ്റേഷനിൽ ബുധനാഴ്ച വൈകിട്ടാണ് സംഭവം. രാജാജിനഗർ സ്വദേശിയായ 40 കാരനാണ് ട്രാക്കിലേക്ക് വീണത്.
സംഭവം ശ്രദ്ധയിൽപ്പെട്ട ഉടൻ സുരക്ഷാ ജീവനക്കാർ അടിയന്തര വൈദ്യുതി വിച്ഛേദന സംവിധാനം പ്രവർത്തിപ്പിച്ച് ട്രാക്കിലേക്കുള്ള വൈദ്യുതി ബന്ധം വിച്ഛേദിച്ചു ഇയാളെ സുരക്ഷിതമായി പുറത്തെടുത്തു. തുടർന്ന് സ്റ്റേഷന് കൺട്രോളർ പോലീസിനെ വിവരം അറിയിക്കുകയായിരുന്നു.
അതേസമയം ഇയാൾ ട്രാക്കിലേക്ക് ചാടാൻ ശ്രമിച്ചതായാണ് ബെംഗളൂരു മെട്രോ റെയിൽ കോർപ്പറേഷൻ ഉദ്യോഗസ്ഥരുടെ നിഗമനം. സംഭവസമയത്ത് പ്ലാറ്റ്ഫോമിലേക്ക് ട്രെയിൻ പ്രവേശിക്കുകയോ സ്റ്റേഷനിൽ നിന്ന് പുറപ്പെടുകയോ ചെയ്തിരുന്നില്ലെന്ന് ഉദ്യോഗസ്ഥൻ പറഞ്ഞു.
തുടര്ന്നു സുബ്രഹ്മണ്യനഗർ പോലീസ് ഇയാളെ സ്റ്റേഷനിലെത്തിച്ച് ചോദ്യം ചെയ്തു. ചോദ്യം ചെയ്യലിന് ശേഷം ഇയാളെ വിട്ടയച്ചതായി പോലീസ് അറിയിച്ചു. സംഭവത്തിൽ ബി.എം.ആർ.സി.എൽ. ഔദ്യോഗികമായി പരാതി നൽകിയിട്ടില്ലെന്നും പോലീസ് വ്യക്തമാക്കി.
സംഭവത്തെ തുടർന്ന് ചെറിയ തോതിൽ ആശങ്ക ഉണ്ടായെങ്കിലും മെട്രോ ട്രെയിൻ സർവീസിന് തടസ്സമുണ്ടായില്ല.
SUMMARY: A 40-year-old man fell onto the tracks at a metro station; escaped without injury
