ഡല്‍ഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ദേശീയ തലസ്ഥാനത്ത് സംഘടിപ്പിച്ച പ്രക്ഷോഭത്തിനിടെ കസ്റ്റഡിയിലെടുത്ത മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനെ എട്ട് മണിക്കൂർ നീണ്ട നാടകീയ അനിശ്ചിതത്വങ്ങള്‍ക്കൊടുവില്‍ ഡല്‍ഹി പോലീസ് വിട്ടയച്ചു. തലസ്ഥാനത്തെ മന്ദിർ മാർഗ്ഗ് പോലീസ് സ്റ്റേഷനില്‍ നിന്നാണ് അദ്ദേഹത്തെ ഒടുവില്‍ മോചിപ്പിച്ചത്.
രാവിലെ പത്തരയോടെ കേരള ഹൗസ് പരിസരത്തുനിന്ന് കസ്റ്റഡിയിലെടുത്ത പിണറായിയെ മൂന്നര മണിക്കൂറോളം പോലീസ് വാഹനത്തിലിട്ട് നഗരത്തില്‍ അങ്ങോളമിങ്ങോളം വട്ടംകറക്കിയ ശേഷമാണ് സ്റ്റേഷനിലെത്തിച്ചതും മണിക്കൂറുകളോളം തടഞ്ഞുവെച്ചതും. സ്റ്റേഷന് പുറത്തിറങ്ങിയതിന് പിന്നാലെ ഡല്‍ഹി പോലീസിന്റെയും കേന്ദ്ര സർക്കാരിന്റെയും ഫാസിസ്റ്റ് നടപടികള്‍ക്കെതിരെ രൂക്ഷമായ ഭാഷയിലാണ് പിണറായി വിജയൻ ആഞ്ഞടിച്ചത്.
“മൂന്നര മണിക്കൂറോളമാണ് എന്നെ വാഹനത്തില്‍ കയറ്റി ചുറ്റിക്കറക്കിയത്. എന്തിനാണ് പോലീസ് ഇത്തരത്തില്‍ ഒരു വിചിത്ര നടപടി സ്വീകരിച്ചത്? ഇങ്ങനെയൊക്കെ ചെയ്താല്‍ സാധാരണക്കാരുടെ പ്രതിഷേധം തണുപ്പിക്കാമെന്ന് പോലീസ് കരുതേണ്ട. ജനാധിപത്യത്തെ അട്ടിമറിച്ച മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെയ്ക്കും വരെ ഈ സമരം അതിശക്തമായി മുന്നോട്ടുപോകും,” പിണറായി വിജയൻ തുറന്നടിച്ചു.
നേരത്തെ ജന്തർ മന്തറിലേക്ക് മാർച്ചിന് തയ്യാറെടുക്കവെ സിപിഎം ജനറല്‍ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദൻ, പി.കെ. ശ്രീമതി, കെ.കെ. ശൈലജ, പിബി അംഗം വിജു കൃഷ്ണൻ, സിഐടിയു നേതാക്കള്‍, എസ്‌എഫ്‌ഐ ദേശീയ അധ്യക്ഷൻ ആദർശ് സജി എന്നിവരെയടക്കം ഡല്‍ഹി പോലീസ് ബലംപ്രയോഗിച്ച്‌ കസ്റ്റഡിയിലെടുത്തിരുന്നു. മുതിർന്ന നേതാവിനെ എട്ട് മണിക്കൂറിലധികം തടങ്കലില്‍ വെച്ച്‌ പീഡിപ്പിച്ച കേന്ദ്ര സർക്കാരിന്റെ പ്രതികാര നടപടിക്കെതിരെ രാജ്യതലസ്ഥാനത്തും കേരളത്തിലും പ്രതിഷേധ പ്രകടനങ്ങള്‍ ഇരമ്പുകയാണ്.
SUMMARY: Police release Pinarayi Vijayan after hours of custody
