തിരുവനന്തപുരം: കേരളത്തിന്റെ പുതിയ ഗവർണറായി ഓം പ്രകാശ് മാഥൂർ സത്യപ്രതിജ്ഞ ചെയ്ത് ചുമതലയേറ്റു. രാജ്ഭവനില്‍ നടന്ന ചടങ്ങില്‍ കേരള ഹൈക്കോടതി ചീഫ് ജസ്റ്റിസ് സൗമെൻ സെൻ സത്യവാചകം ചൊല്ലിക്കൊടുത്തു. സംസ്ഥാനത്തിന്റെ 29-ാമത് ഗവർണറായാണ് മാഥൂർ ചുമതലയേറ്റത്. മുഖ്യമന്ത്രി വി.ഡി. സതീശൻ, നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, മന്ത്രിമാർ, ജനപ്രതിനിധികള്‍ തുടങ്ങിയവർ ചടങ്ങില്‍ പങ്കെടുത്തു.
തമിഴ്നാട് ഗവർണറായി രാജേന്ദ്ര വിശ്വനാഥ് അർലേക്കർ ചുമതലയേറ്റതിനെത്തുടർന്നാണ് കേരളത്തില്‍ പുതിയ ഗവർണറെ നിയമിച്ചത്. സിക്കിം ഗവർണറായി പ്രവർത്തിച്ചുവരികയായിരുന്നു ഓം പ്രകാശ് മാഥൂർ. ഇന്നലെ തിരുവനന്തപുരം വിമാനത്താവളത്തിലെ ടെക്നിക്കല്‍ കോംപൗണ്ട് പരിസരത്ത് മുഖ്യമന്ത്രിയുടെ നേതൃത്വത്തില്‍ ഔദ്യോഗിക ബഹുമതികളോടെയാണ് മാഥൂറിനെ സ്വീകരിച്ചത്. മന്ത്രിമാർ, ചീഫ് സെക്രട്ടറി, തിരുവനന്തപുരം മേയർ വി.വി. രാജേഷ്, മുതിർന്ന പൊലീസ് ഉദ്യോഗസ്ഥർ തുടങ്ങിയവർ സ്വീകരണച്ചടങ്ങില്‍ പങ്കെടുത്തിരുന്നു.
‘ദൈവത്തിന്റെ സ്വന്തം നാടായ കേരളത്തില്‍ പുതിയൊരു യാത്രയ്ക്ക് തുടക്കം കുറിക്കുന്നതില്‍ അതിയായ സന്തോഷമുണ്ട്’ എന്നായിരുന്നു കേരളത്തിലെത്തിയ ശേഷമുള്ള മാഥൂറിന്റെ ആദ്യ പ്രതികരണം.
SUMMARY: Om Prakash Mathur has taken charge as the 29th Governor of Kerala
