തിരുവനന്തപുരം: വന്യജീവി ആക്രമണത്തിലെ കൃഷിനാശത്തിന്റെ നഷ്ടപരിഹാര തുക വര്‍ധിപ്പിച്ചു. 100 ശതമാനമാണ് വര്‍ധിപ്പിച്ചത്. നഷ്ടപരിഹാരത്തിന്റെ പരിധി, അപേക്ഷകളുടെ എണ്ണത്തിലെ നിയന്ത്രണം എന്നിവ പൂര്‍ണമായും ഒഴിവാക്കി സംസ്ഥാന സര്‍ക്കാര്‍ ഉത്തരവിറക്കി. നഷ്ടപരിഹാര തുകയ്ക്ക് ഏർപ്പെടുത്തിയിരുന്ന പരമാവധി പരിധിയും കർഷകർ സമർപ്പിക്കുന്ന അപേക്ഷകളുടെ എണ്ണത്തിലുള്ള നിയന്ത്രണങ്ങളും ഒഴിവാക്കിക്കൊണ്ടാണ് സംസ്ഥാന സർക്കാർ പുതിയ ഉത്തരവ് പുറപ്പെടുവിച്ചിരിക്കുന്നത്. കാട്ടാന, കാട്ടുപന്നി, മുള്ളൻപന്നി, പുലി എന്നിവയുടെ ആക്രമണം വ്യാപകമായി തുടരുന്ന സാഹചര്യത്തിലാണ് കർഷകർക്ക് വലിയ ആശ്വാസം പകരുന്ന ഈ തീരുമാനം.
കാർഷിക വിളകളായ തേങ്ങ, കൊക്കോ എന്നിവയെ പുതുതായി നഷ്ടപരിഹാര പരിധിയിൽ ഉൾപ്പെടുത്തിയിട്ടുണ്ട്. ഇതുപ്രകാരം വന്യജീവി ആക്രമണത്തിൽ നശിക്കുന്ന തേങ്ങ ഒന്നിന് 15 രൂപ നിരക്കിലും കൊക്കോയ്ക്ക് കിലോഗ്രാമിന് 30 രൂപ നിരക്കിലും നഷ്ടപരിഹാരം ലഭിക്കും.
കഴിഞ്ഞ 10 വർഷത്തെ കണക്കുകൾ വിശദമായി പരിശോധിച്ചപ്പോൾ, നിലവിൽ നൽകിവരുന്ന തുക വളരെ കുറവാണെന്ന് ബോധ്യപ്പെട്ടതിനെ തുടർന്നാണ് നിരക്ക് ഉയർത്താൻ തീരുമാനിച്ചത്. നഷ്ടപരിഹാര തുകയിൽ കാലാനുസൃതമായ വർധനവ് വരുത്തണമെന്ന് കാണിച്ച് ചീഫ് വൈൽഡ് ലൈഫ് വാർഡൻ സർക്കാരിലേക്ക് ശുപാർശ സമർപ്പിച്ചിരുന്നു. ഈ ശുപാർശ പരിഗണിച്ചാണ് ഉത്തരവിറക്കിയത്. കൃഷിനാശമോ കാർഷികോല്പന്നങ്ങളുടെ നാശമോ ഉണ്ടായാൽ നഷ്ടം കൃത്യമായി വിലയിരുത്തുന്നതിനായി കർഷകർ 72 മണിക്കൂറിനുള്ളിലോ പരമാവധി രണ്ട് ആഴ്ചയ്ക്കുള്ളിലോ അധികൃതരെ വിവരം അറിയിക്കേണ്ടതാണ്. തുടർന്ന് നിശ്ചിത മാനദണ്ഡങ്ങൾ പാലിച്ച് ആറ് മാസത്തിനുള്ളിൽ ഔദ്യോഗികമായി നഷ്ടപരിഹാരത്തിനുള്ള അപേക്ഷ സമർപ്പിക്കണമെന്നും ഉത്തരവിൽ വ്യക്തമാക്കുന്നു. അതേസമയം, അപേക്ഷകരുടെ അർഹത സംബന്ധിച്ച് നിലവിലുള്ള മറ്റ് നിബന്ധനകളിൽ മാറ്റങ്ങളൊന്നുമില്ലെന്നും അവ പഴയതുപോലെ തന്നെ തുടരുമെന്നും വനംവകുപ്പ് അറിയിച്ചു.
SUMMARY: Wildlife attacks: Compensation for crop damage doubled
