കൊച്ചി: സിനഗോഗിന് മുന്നില്‍ തീയിട്ട കേസില്‍ പ്രതി എബിന്‍ പോളിനെതിരെ യുഎപിഎ ചുമത്തി. കേസ് അന്വേഷണം വൈകാതെ എന്‍ഐഎ ഏറ്റെടുക്കും. മൂവാറ്റുപുഴയില്‍ ആള്‍വാസമില്ലാത്ത കെട്ടിടത്തില്‍ ആക്രമണം നടത്തിയതിലും മൂവാറ്റുപുഴ യൂസ്ഡ് കാർ ഷോറൂം ആക്രമണത്തിലും എബിനെ പ്രതി ചേർത്തിരുന്നു. കേസിന്റെ ഗൗരവ സ്വഭാവം കണക്കിലെടുത്ത് അന്വേഷണം വൈകാതെ ദേശീയ അന്വേഷണ ഏജൻസി ഏറ്റെടുക്കും.
നിലവില്‍ നാല് കേസുകളാണ് എബിൻ പോളിനെതിരെ പോലീസ് രജിസ്റ്റർ ചെയ്തിട്ടുള്ളത്. മൂന്നിടങ്ങളില്‍ ഇയാള്‍ അക്രമണം നടത്തിയതായി അന്വേഷണ സംഘം കണ്ടെത്തിയിട്ടുണ്ട്. യുഎപിഎയിലെ 16, 18 വകുപ്പുകളാണ് എബിൻ പോളിനെതിരെ ചുമത്താൻ തീരുമാനിച്ചിരിക്കുന്നത്. ഇന്ത്യയുടെ ഐക്യം തകർക്കാൻ ലക്ഷ്യമിട്ടുള്ള അക്രമം, ഭീകര പ്രവർത്തനങ്ങള്‍ക്കായുള്ള ആസൂത്രണവും ഗൂഢാലോചനയും തുടങ്ങിയ ഗുരുതര കുറ്റങ്ങളാണ് ഇയാള്‍ക്കെതിരെ ചുമത്തുക.
എബിൻ പോളിന്റെ പശ്ചാത്തലവും സൗഹൃദ വലയങ്ങളും ആഴത്തില്‍ മനസ്സിലാക്കുന്നതിനായി കഴിഞ്ഞ ദിവസം അന്വേഷണ സംഘം ഇയാള്‍ പഠിച്ച പൂനെയിലെ വിദ്യാഭ്യാസ സ്ഥാപനത്തില്‍ നേരിട്ടെത്തി വിവരങ്ങള്‍ ശേഖരിച്ചിരുന്നു. സിനഗോഗിന് മുന്നില്‍ തീയിട്ടതിന് പുറമെ, മൂവാറ്റുപുഴയിലെ ഒരു യൂസ്ഡ് കാർ ഷോറൂമിനും ഒഴിഞ്ഞുകിടന്ന വീടിനും തീവെച്ചതിന് പിന്നിലും എബിനാണെന്ന് കണ്ടെത്തിയതോടെയാണ് സംഭവത്തിന്റെ ഗൗരവം വർധിച്ചത്. തുടർന്നാണ് കേസില്‍ കർശന വകുപ്പുകള്‍ ചുമത്താനുള്ള തീരുമാനത്തിലേക്ക് അന്വേഷണ സംഘം എത്തിയത്.
SUMMARY: Incident involving arson in front of a synagogue in Kochi; UAPA invoked against the accused, Ebin Paul
