ബെംഗളൂരു: നഗരത്തിലെ ഹോസ ഗുഡ്ഡദഹള്ളിയിൽ വീട്ടിൽ ഒറ്റയ്ക്ക് താമസിച്ചിരുന്ന വയോധികയെ വീട്ടിനുള്ളിൽ കൊല്ലപ്പെട്ട നിലയിൽ കണ്ടെത്തി. വെങ്കടലക്ഷ്മമ്മ എന്ന 70 കാരിയാണ് കൊല്ലപ്പെട്ടത്. ഒക്ടോബർ 24-ന് വൈകുന്നേരമാണ് സംഭവം പുറത്തറിഞ്ഞത്. ഒക്ടോബർ 23-ന് ഉച്ചയോടെയായിരിക്കാം കൊലപാതകം നടന്നതെന്നാണ് പ്രാഥമിക നിഗമനം.
സി ക്രോസ്, ഒന്നാം മെയിൻ റോഡിലെ വീട്ടിലായിരുന്നു വെങ്കടലക്ഷ്മമ്മ താമസിച്ചിരുന്നത്. ഏറെ നേരമായി ഇവരെ പുറത്തുകാണാത്തതിനെ തുടർന്ന് അയൽവാസികൾ അന്വേഷിച്ചെത്തുകയായിരുന്നു. ഇവരുടെ ഉടമസ്ഥതയിലുള്ള നാല് വീടുകളിൽ ഒന്നിൽ വാടകയ്ക്ക് താമസിക്കുന്ന 21കാരനായ ലേഖിത് വീട്ടിലെത്തിയപ്പോൾ രക്തത്തിൽ കുളിച്ച നിലയിൽ മൃതദേഹം കണ്ടെത്തിയെന്നാണ് റിപ്പോർട്ട്. തുടർന്ന് അടിയന്തര സഹായ നമ്പറായ 112-ൽ വിളിച്ച് വിവരം അറിയിക്കുകയായിരുന്നു.
വിവരമറിഞ്ഞ് ബ്യാതരായണപുര പോലീസ് സ്ഥലത്തെത്തി പരിശോധന നടത്തി. മൃതദേഹത്തിലെ തലയ്ക്കേറ്റ പരിക്കുകൾ കൊലപാതകമാണെന്ന സംശയത്തിലേക്ക് അന്വേഷണത്തെ നയിച്ചു. സംഭവസ്ഥലത്തുനിന്ന് ഫോറൻസിക് തെളിവുകൾ ശേഖരിച്ച പോലീസ് പ്രതികളെ കണ്ടെത്തുന്നതിനായി പ്രത്യേക സംഘങ്ങൾ രൂപീകരിച്ചു.
കൊലപാതകത്തിന് പിന്നിലെ കാരണം ഇതുവരെ വ്യക്തമായിട്ടില്ലെന്ന് വെസ്റ്റ് ഡിവിഷൻ ഡെപ്യൂട്ടി പോലീസ് കമ്മീഷണർ യതീഷ് എൻ അറിയിച്ചതായി റിപ്പോർട്ടുകളിലുണ്ട്. സ്വർണാഭരണങ്ങളോ മറ്റ് വിലപിടിപ്പുള്ള വസ്തുക്കളോ ലക്ഷ്യമിട്ടുള്ള കവർച്ചയാണോ, അതോ വ്യക്തിവൈരാഗ്യമാണോ സംഭവത്തിന് പിന്നിലെന്നാണ് പോലീസ് പരിശോധിക്കുന്നത്. പ്രതികളെ പിടികൂടിയ ശേഷമേ കൊലപാതകത്തിന്റെ യഥാർഥ കാരണം വ്യക്തമാകൂ.
ഭർത്താവ് വർഷങ്ങൾക്കുമുമ്പ് മരിച്ചതിനെത്തുടർന്ന് വെങ്കടലക്ഷ്മമ്മ ഒറ്റയ്ക്കായിരുന്നു താമസം. ഏക മകളും അസുഖത്തെത്തുടർന്ന് ഏകദേശം രണ്ടുവർഷം മുമ്പ് മരിച്ചതായാണ് റിപ്പോർട്ട്. പ്രദേശത്ത് ഇവർക്ക് ഒന്നിലധികം വീടുകളുണ്ടായിരുന്നു. വാടകക്കാരനായ ലേഖിത് ഇടയ്ക്കിടെ ഇവരുമായി ബന്ധപ്പെട്ടിരുന്നതായും ആവശ്യമായ മരുന്നുകൾ ലഭ്യമാക്കാൻ സഹായിച്ചിരുന്നതായും റിപ്പോർട്ടിൽ പറയുന്നു.
വീട്ടിൽ ഒറ്റയ്ക്ക് താമസിച്ചിരുന്ന വയോധികയുടെ കൊലപാതകം പ്രദേശവാസികൾക്കിടയിൽ ആശങ്കയുണ്ടാക്കിയിട്ടുണ്ട്. സംഭവവുമായി ബന്ധപ്പെട്ട് ആരെയെങ്കിലും അറസ്റ്റ് ചെയ്തിട്ടില്ല അന്വേഷണം തുടരുകയാണ്.
SUMMARY: An elderly woman was found murdered inside her home in Bengaluru.
