ബെംഗളൂരു: വടക്കുപടിഞ്ഞാറൻ കർണാടക റോഡ് ട്രാൻസ്പോർട്ട് കോർപ്പറേഷന്റെ (എൻ‌ഡബ്ല്യുകെ‌ആർ‌ടി‌സി) പേര് കിത്തൂർ റാണി ചെന്നമ്മ റോഡ് ട്രാൻസ്പോർട്ട് കോർപ്പറേഷൻ എന്നാക്കുമെന്ന് മുഖ്യമന്ത്രി ഡി.കെ. ശിവകുമാർ. ബെളഗാവി ജില്ലയിലെ ചരിത്രപ്രസിദ്ധമായ കിത്തൂരിൽ ഞായറാഴ്ച നടന്ന മൂന്നുദിവസത്തെ കിത്തൂർ ഉത്സവത്തിന്റെ സമാപനച്ചടങ്ങിൽ സംസാരിക്കുകയായിരുന്നു അദ്ദേഹം.
ബ്രിട്ടീഷ് ഭരണത്തിനെതിരെ പോരാടിയ കിത്തൂർ റാണി ചെന്നമ്മയുടെ ധീരതയും ത്യാഗവും സ്വാഭിമാനവും പുതുതലമുറയ്ക്ക് പരിചയപ്പെടുത്തുന്നതിനും അവരുടെ ചരിത്രസ്മരണ നിലനിർത്തുന്നതിനുമുള്ള നടപടികളുടെ ഭാഗമായാണ് പേര് മാറ്റാനുള്ള തീരുമാനം. വരും ദിവസങ്ങളിൽ കോർപ്പറേഷന്റെ പേര് മാറ്റുന്നതിനുള്ള നടപടികൾ സ്വീകരിക്കുമെന്ന് മുഖ്യമന്ത്രി വ്യക്തമാക്കി.
കിത്തൂർ റാണി ചെന്നമ്മയുടെ ചരിത്രവും ബ്രിട്ടീഷ് ഭരണത്തിനെതിരായ പോരാട്ടവും ജനങ്ങളിലേക്ക് എത്തിക്കുന്നതിനായി കിത്തൂരിൽ ഫ്രീഡം പാർക്ക് നിർമിക്കുമെന്നും മുഖ്യമന്ത്രി അറിയിച്ചു. പദ്ധതിക്കായി അടുത്ത സംസ്ഥാന ബജറ്റിൽ 40 കോടി വകയിരുത്തും. ഇതുമായി ബന്ധപ്പെട്ട സർക്കാർ ഉത്തരവ് പുറപ്പെടുവിക്കുന്നതിനുള്ള നടപടികളും സ്വീകരിക്കുമെന്ന് അദ്ദേഹം പറഞ്ഞു.
റാണി ചെന്നമ്മയുടെ ജീവിതവും പോരാട്ടവും ചരിത്രപ്രാധാന്യമുള്ള കിത്തൂർ കോട്ടയുടെ പൈതൃകവും പുതിയ തലമുറയ്ക്ക് പരിചയപ്പെടുത്തുകയാണ് പദ്ധതിയുടെ പ്രധാന ലക്ഷ്യം. കിത്തൂരിനെ പ്രധാന വിനോദസഞ്ചാര കേന്ദ്രമായി വികസിപ്പിക്കണമെന്ന പ്രാദേശിക ജനപ്രതിനിധികളുടെ ആവശ്യത്തോടും മുഖ്യമന്ത്രി അനുകൂലമായി പ്രതികരിച്ചു.
SUMMARY: New Name for North Western Karnataka Road Transport Corporation
