ബെംഗളൂരു: നിരോധിത വസ്തുക്കളുടെ സാന്നിധ്യം ഇല്ലാത്ത ജയിലായി ബെംഗളൂരു സെൻട്രൽ ജയിലിനെ പ്രഖ്യാപിച്ചു. ജയിൽവകുപ്പ് നടത്തിയ തുടർച്ചയായ മിന്നൽ പരിശോധനകളിൽ മൊബൈൽ ഫോണുകൾ, കഞ്ചാവ്, പുകയില തുടങ്ങിയ നിരോധിത വസ്തുക്കളൊന്നും കണ്ടെത്താനായില്ലെന്ന് ജയിൽ വകുപ്പ് മേധാവി അലോക് കുമാർ അറിയിച്ചു. കർണാടക രാജ്യോത്സവത്തോടനുബന്ധിച്ച് ജയിലിൽ സംഘടിപ്പിച്ച പരിപാടിയിലായിരുന്നു പ്രഖ്യാപനം.
ജയിലിനുള്ളിൽ മൊബൈൽ ഫോണുകളും ലഹരിവസ്തുക്കളും എത്തുന്നത് തടയാൻ പരിശോധനയും നിരീക്ഷണവും ശക്തമാക്കിയിരുന്നു. ഇതിന്റെ ഭാഗമായി നടത്തിയ പരിശോധനകളിലാണ് നിരോധിത വസ്തുക്കൾ കണ്ടെത്താത്തതെന്ന് അധികൃതർ വ്യക്തമാക്കി.
അതേസമയം, തടവുകാരുടെ മാനസികവും സാംസ്കാരികവുമായ പുനരധിവാസത്തിന് പ്രാധാന്യം നൽകുന്ന പരിപാടികളും ജയിലിൽ സംഘടിപ്പിച്ചു. രാജ്യോത്സവാഘോഷത്തിന്റെ ഭാഗമായി അവതരിപ്പിച്ച നാടകത്തിൽ മികച്ച പ്രകടനം കാഴ്ചവെച്ച ആറു തടവുകാർക്ക് ശിക്ഷയിൽ 30 ദിവസത്തെ ഇളവ് അനുവദിച്ചതായും റിപ്പോർട്ടുണ്ട്.
ജയിലിലെ അച്ചടക്കം ഉറപ്പാക്കുന്നതിനൊപ്പം തടവുകാരുടെ സർഗാത്മക കഴിവുകൾ പ്രോത്സാഹിപ്പിക്കുകയും സമൂഹത്തിലേക്ക് തിരിച്ചെത്താനുള്ള സാഹചര്യം ഒരുക്കുകയും ചെയ്യുന്നതിന്റെ ഭാഗമായാണ് ഇത്തരം പരിപാടികൾ സംഘടിപ്പിക്കുന്നത്.
SUMMARY: Bengaluru Central Prison declared ‘prohibited items-free’
