കണ്ണൂർ: മുൻ ആരോഗ്യ മന്ത്രി വീണാ ജോർജിനെ കെ.എസ്.യു പ്രവർത്തകർ ആക്രമിച്ചെന്ന കേസില്‍ നിർണായക റിപ്പോർട്ടുമായി പ്രത്യേക അന്വേഷണ സംഘം. പ്രതിഷേധക്കാർക്കെതിരെ ചുമത്തിയ കുറ്റങ്ങള്‍ നിലനില്‍ക്കില്ലെന്ന് ചൂണ്ടിക്കാട്ടി എസ്.ഐ.ടി കണ്ണൂർ ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയില്‍ അന്തിമ റിപ്പോർട്ട് സമർപ്പിച്ചു. എസ്.ഐ.ടി തലവൻ യു. പ്രേമനാണ് റിപ്പോർട്ട് നല്‍കിയത്.
കലാപശ്രമം, റെയില്‍വേ പരിസരത്ത് അതിക്രമിച്ചു കടക്കല്‍ തുടങ്ങിയ കുറ്റങ്ങള്‍ പ്രതിഷേധക്കാർ ചെയ്തിട്ടില്ലെന്നാണ് റിപ്പോർട്ടിലെ കണ്ടെത്തല്‍. പോലീസിന്റെ ഔദ്യോഗിക കൃത്യനിർവഹണം തടസ്സപ്പെടുത്തിയിട്ടില്ലെന്നും കരിങ്കൊടി പ്രതിഷേധം കുറ്റകരമല്ലെന്നും റിപ്പോർട്ടില്‍ വ്യക്തമാക്കുന്നു. വീണാ ജോർജിനെ കെ.എസ്.യു പ്രവർത്തകർ ആക്രമിച്ചിട്ടില്ലെന്നും പ്രതിഷേധക്കാർക്ക് മന്ത്രിയുടെ അടുത്തെത്താൻ കഴിഞ്ഞിരുന്നില്ലെന്നും എസ്.ഐ.ടി നേരത്തെ ഡി.ജി.പിക്ക് നല്‍കിയ റിപ്പോർട്ടിലും വ്യക്തമാക്കിയിരുന്നു.
ആക്രമണത്തിന് ഉപയോഗിച്ചെന്ന് ആരോപിക്കപ്പെട്ട ആയുധങ്ങള്‍ കണ്ടെത്താനായിട്ടില്ല. ഗണ്‍മാൻ അഭിലാഷിന്റെ മൊഴിയിലും മാറ്റമുണ്ടായതോടെ ആക്രമണം നടന്നെന്ന ആരോപണത്തിന് തെളിവില്ലെന്നാണ് അന്വേഷണ സംഘത്തിന്റെ നിലപാട്. കെ.എസ്.യു പ്രവർത്തകരും പോലീസും തമ്മില്‍ ഉന്തും തള്ളും മാത്രമാണ് ഉണ്ടായതെന്നും റിപ്പോർട്ടില്‍ പറയുന്നു. കണ്ണൂർ റെയില്‍വേ സ്റ്റേഷനില്‍ വീണാ ജോർജിനെതിരെയുണ്ടായ പ്രതിഷേധത്തെ തുടർന്നാണ് അഞ്ച് കെ.എസ്.യു പ്രവർത്തകർക്കെതിരെ വധശ്രമം ഉള്‍പ്പെടെയുള്ള വകുപ്പുകള്‍ ചുമത്തി കേസെടുത്തത്.
പ്രതിഷേധക്കാർ ആയുധം ഉപയോഗിച്ച്‌ മന്ത്രിയെ ആക്രമിക്കാൻ ശ്രമിച്ചെന്നായിരുന്നു ഗണ്‍മാൻ അഭിലാഷിന്റെ ആദ്യ മൊഴി. എന്നാല്‍, എസ്.ഐ.ടിക്ക് മുന്നില്‍ നല്‍കിയ മൊഴിയില്‍ ആക്രമണശ്രമം നേരിട്ട് കണ്ടിട്ടില്ലെന്ന് അഭിലാഷ് വ്യക്തമാക്കിയതായാണ് വിവരം. വീണാ ജോർജിന്റെ നിർദേശപ്രകാരമാണ് തെറ്റായ മൊഴി നല്‍കിയതെന്നും അഭിലാഷ് വെളിപ്പെടുത്തിയതായി റിപ്പോർട്ടുകളുണ്ട്.
SUMMARY: Case regarding the attack on Veena George: SIT gives clean chit to KSU activists
