ബെംഗളൂരു: വോട്ടർപട്ടികയുടെ പ്രത്യേക തീവ്ര പരിഷ്കരണമായ എസ്.ഐ.ആറിനെതിരെ ഇന്ത്യാ മുന്നണി ഇന്ന് ബെംഗളൂരുവിലെ ഫ്രീഡം പാർക്കിൽ പ്രതിഷേധം സംഘടിപ്പിക്കും. രാവിലെ 10.30ന് ആരംഭിക്കുന്ന പ്രതിഷേധത്തിൽ കോൺഗ്രസ് ഉൾപ്പെടെ മുന്നണിയിലെ വിവിധ കക്ഷികളുടെ നേതാക്കളും പ്രവർത്തകരും പങ്കെടുക്കും.
വോട്ടർപട്ടിക പരിഷ്കരണത്തിന്റെ പേരിൽ അർഹരായ വോട്ടർമാരുടെ പേരുകൾ ഒഴിവാക്കപ്പെടുന്നുവെന്നാണ് ഇന്ത്യാ മുന്നണിയുടെ ആരോപണം. എസ്.ഐ.ആർ നടപടികൾ റദ്ദാക്കുക, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കുക, അദ്ദേഹത്തിനെതിരെ നിയമനടപടി സ്വീകരിക്കുക തുടങ്ങിയ ആവശ്യങ്ങളാണ് പ്രതിഷേധക്കാർ ഉന്നയിക്കുന്നത്.
കർണാടക പ്രദേശ് കോൺഗ്രസ് കമ്മിറ്റി (കെ.പി.സി.സി.) പ്രസിഡന്റ് ബി.കെ. ഹരിപ്രസാദാണ് പ്രതിഷേധത്തിന്റെ പ്രഖ്യാപനം നടത്തിയത്. നവംബർ ഒന്നിന് ന്യൂഡൽഹിയിലെ രാംലീല മൈതാനത്ത് ഇന്ത്യാ മുന്നണി സംഘടിപ്പിച്ച പ്രതിഷേധത്തിന്റെ തുടർച്ചയായാണ് ബെംഗളൂരുവിലെ പരിപാടി.
മുഖ്യ തിരഞ്ഞെടുപ്പ് കമ്മീഷണറെ നിയമിക്കുന്ന നടപടിക്രമം കൂടുതൽ ജനാധിപത്യപരമാക്കണമെന്നും സുപ്രീംകോടതിയുടെ നിർദേശങ്ങൾ പാലിക്കണമെന്നും സി.പി.ഐ.എം. സംസ്ഥാന സെക്രട്ടറി കെ. പ്രകാശ് ആവശ്യപ്പെട്ടിട്ടുണ്ട്. മുഖ്യ തിരഞ്ഞെടുപ്പ് കമ്മീഷണർക്ക് സ്ഥിരമായ നിയമപരിരക്ഷ നൽകുന്ന വ്യവസ്ഥ പിൻവലിക്കണമെന്നും മുന്നണി ആവശ്യപ്പെടുന്നു.
കോൺഗ്രസിന് പുറമെ സി.പി.ഐ., സി.പി.ഐ.എം., സി.പി.ഐ.എം.എൽ. ലിബറേഷൻ, ഫോർവേഡ് ബ്ലോക്ക്, സമാജ്‌വാദി പാർട്ടി, ഇന്ത്യൻ യൂണിയൻ മുസ്‌ലിം ലീഗ് തുടങ്ങിയ കക്ഷികളുടെ പ്രതിനിധികളും പ്രതിഷേധത്തിൽ പങ്കെടുക്കുമെന്ന് നേതാക്കൾ അറിയിച്ചു.
ബെംഗളൂരുവിലെ സംസ്ഥാനതല പ്രതിഷേധത്തിന് ശേഷം കർണാടകയിലെ വിവിധ ജില്ലകളിലും താലൂക്കുകളിലും പ്രക്ഷോഭം വ്യാപിപ്പിക്കാനാണ് ഇന്ത്യാ മുന്നണിയുടെ തീരുമാനം.
SUMMARY: India BLOC protest against SIR today at Freedom Park
